کورونا وائرس کی وباء کے باعث ملک میں لاک ڈاؤن کیے جانے کے انٹرنیٹ کے استعمال میں غیر معمولی اضافہ ہوا ہے۔

تفصیلات کے مطابق کورونا وائرس  عالمی وباء  بن چکا ہے اور اس سے بچاؤ کی تدابیر کے لیے دنیا بھر کے کئی ممالک میں مکمل لاک ڈاؤن جبکہ بعض میں  جزوی لاک ڈاؤن ہے۔

لاک ڈاؤن کے باعث  نہ صرف دنیا  بھر میں بلکہ پاکستان میں بھی انٹرنیٹ کا استعمال بڑھ گیا ہے۔ شہریوں کی کثیرتعداد گھر میں بیٹھ کر انٹرنیٹ پر فلمیں،ڈرامے اور ٹی وی شوز دیکھنے کے  لیے انٹرنیٹ استعمال کر رہی ہے۔

کورونا وائرس کے نتیجے میں فیس بک کے استعمال میں اضافہ ریکارڈ

ٹیلی کام سیکٹر کے ماہرین کا کہنا ہے کہ  ملک بھر میں انٹرنیٹ کا استعمال مجموعی طورپر 15 فی صد بڑھ گیا ہے۔

ماہرین نے لوگوں کو بلاوجہ انٹرنیٹ استعمال نہ کرنے کا مشورہ  دیتے ہوئے کہا ہے کہ انٹرنیٹ کا استعمال موجود ہ شرح کے مطابق بڑھتا رہا تو سسٹم چوک ہونے کا اندیشہ ہے۔

ماہرین کا کہنا ہے کہ انٹرنیٹ کو طویل ویڈیوز، گڈ مارننگ سمیت دیگر اضافی پیغامات بھیجنے کے لیے استعمال نہ کیا جائے۔

پاکستان ٹیلی کام اتھارٹی ( پی ٹی اے) نے انٹرنیٹ کے استعمال میں اضافے کی توثیق  کرتے ہوئے کہا ہے کہ صارفین کو انٹرنیٹ کی رفتار، بلا رکاوٹ فراہمی اور بہتر خدمات کے لئے کوشاں ہیں۔

واضح رہے کہ  کورونا وائرس کی وجہ سے سوشل میڈیا ویب سائٹس کے استعمال میں  تیزی بڑھ گئی۔دنیا بھر میں اس وبا ءکے دوران گھروں تک محدود کروڑوں افراد کی جانب سے انٹرنیٹ پر انحصار بڑھ چکا ہے۔

 فیس بک ایپس پر گزارے جانے والے وقت کے دورانیے میں 70 فیصد اضافہ ہوا ہے جبکہ ایک ہفتے میں فیس بک لائیو اور اس کی زیرملکیت ایپ انسٹاگرام کے ویوز دوگنا ہوگئے ہیں۔