وفاقی وزیر برائے انفامیشن ٹیکنالوجی و ٹیلی کمیونیکشن سید امین الحق نے کہا ہے حکومت ملک بھر میں انفارمیشن ٹیکنالوجی کے فروغ میں تعاون کے لئے پرعزم ہے۔

وفاقی وزیر برائے انفامیشن ٹیکنالوجی و ٹیلی کمیونیکشن سید امین الحق نے تقریب سے خطاب کرتے ہوئے کہا ہے کہ انٹرنیٹ کی سہولت کی فراہمی سے لوگوں کا معیار زندگی بلند ہوگا۔

 امین الحق کا اپنے خطاب کے دوران کہنا تھا کہ بلوچستان، خیبر پختونخوا، گلگت بلتستان اور آزاد کشمیر کے دور آفتادہ علاقوں میں بھی تھری جی اور فور جی کی سہولت فراہم کی جائے گی اور اس کے ساتھ ہی ساتھ دور دراز علاقوں میں انٹرنیٹ کی فراہمی کے لئے انفراسٹرکچر کو بہتر بنایا جا رہا ہے۔

وفاقی وزیر کا مزید کہنا یہ تھا کہ یونیورسل فنڈ اور ٹیلی نار کے درمیان معاہدے کے تحت انٹرنیٹ کی تیز ترین سروس فراہم کی جائے گی ۔

انہوں نے بتایا کہ اس معاہدے سے نہ صرف خواتین کو بااختیار بنانے کا موقع ملے گا بلکہ ملازمتوں کے مواقع بھی پیداہوں گے اور یونیورسل فنڈ براڈ بینڈ سروسز کے حوالے سے دوسرے ممالک کے لئے ایک رول ماڈل ہے۔

 دوسری جانب چیف ایگزیکٹو آفیسر ٹیلی نار پاکستان نے بتایا ہے کہ یونیورسل فنڈ نے 650 ملین روپے سے ہائی سپیڈ موبائل براڈ بینڈ کا منصوبہ شروع کیا ہے، معاہدے سے بیس لاکھ افراد کو فائدہ پہنچے گا کیونکہ یونیورسل سروس فنڈ اور ٹیلی نار پاکستان مل کر ملک کے دور دراز علاقوں تک انٹرنیٹ پہنچائیں گے۔

ان کا کہنا تھا کہ ملک بھر کے دور دراز علاقوں میں ٹیلی کمیونیکیشن کی سہولت کی فراہمی کے لئے ہر ممکن اقدامات کررہے ہیں۔