ٹیکنالوجی کمپنی ایپل نے اپنے صارفین کی بڑی مشکل حل کرتے ہوئے یہ  حقیقی ‏اقدامات اٹھائے ہیں۔

ایپل کمپنی نے اپنے صارفین کی سہولت کے لئے آئی فونز کے اسپیئرپارٹس اور ٹولز فروخت کرنے کا اعلان کیا ہے۔

‏کمپنی کے مطابق وہ اپنے صارفین کو آئی فونز اور میک کمپیوٹرز کے آلات اور پرزے فراہم کریں گے تاکہ وہ ‏اپنے طور پر متاثرہ ڈیوائسز کی مرمت کر سکیں۔

ایپل نے کہا کہ آن لائن اسٹور تقریباً 200 حصوں اور ٹولز کے ساتھ شروع ہو گا جس کا مقصد آئی فون 12 اور 13 ‏ماڈلز پر ڈسپلے، بیٹریوں اور کیمروں سے متعلق سب سے عام مسائل کو حل کرنا ہے۔

کمپنی کا کہنا ہے کہ یہ پروگرام اگلے سال کے اوائل میں ریاستہائے متحدہ میں شروع ہو گا اور سال کے آخر میں ‏مزید ممالک تک اس کو پھیلایا جائے گا۔

سال 2019 میں ایپل نے ایک پروگرام شروع کیا تھا جس میں مرمت کے لئے آزاد مراکز اپنے طور پر  اوزار، پرزے اور دیگر ‏اشیاء خرید سکتے تھے۔

 اس پروگرام میں اب تک 5,000 براہ راست مجاز مرمت فراہم کرنے والوں کے علاوہ 2,800 ‏آزاد مراکز شامل ہیں۔

سیلف سروس پروگرام کے تحت ایپل کے صارفین ہدایت نامہ پڑھنے کے بعد ان پرزوں کو براہ راست خرید سکیں ‏گے تاکہ وہ خود بھی مرمت کر سکیں۔