امریکہ میں لوگوں کو قرض دینے والی کمپنی نے اپنے 900 ملازمین کو زوم کال کے دوران ملازمت سے فارغ کردیا ہے۔

زوم کال کے دوران کمپنی کے چیف ایگزیکٹیو آفیسر وشال گارج نے ملازمین کو مخاطب کرتے ہوئے کہا کہ یہ ایسی خبر نہیں ہے جسے آپ سننا چاہیں گے، اگر آپ اس کال پر ہیں، تو آپ اس بدقسمت گروپ کا حصہ ہیں جس کو فوری طور پر ان کی ملازمت سےنکالا جارہا ہے۔

وشال گارج نے کہا کہ مارکیٹ بدل چکی ہے اب اس کمپنی کو بچانے کے لیے بڑے پیمانے پر لوگوں کو ملازمتوں سے فارغ کرنا ضروری ہوگیا تھا۔

زوم کال کے دوران وشال گارج نے کہا کہ وہ اپنے کیرئیر میں دوسری مرتبہ اتنی بڑی تعداد میں ملازمین کو فارغ کررہے ہیں، پہلی بار جب میں نے ایسا کیا تھا تو رو پڑاتھا لیکن میں اس وقت خود کو قدرے مضبوط محسوس کررہا ہوں۔

ملازمین کو مارکیٹ کی صورت حال اور ملازمین کی کارکردگی کی وجہ سے برطرف کررہے ہیں۔

اس حوالے سے ایک شخص نے سوشل ویب سائٹ پر لکھا کہ نکالے گئےافراد میں سے 250 لوگ ایسے تھے جو کمپنی کے کھاتوں کے مطابق 8 گھنٹے یومیہ نوکری کرتے تھے لیکن درحقیقت وہ 2 گھنٹے بھی اپنے فرائض سرانجام نہیں دیتے تھے۔ وہ دیگر ملازمین اور کمپنی کے صارفین سے چوری کررہے تھے۔

بعد ازاں وشال گارج نے ایک اخبار سے بات کرتے ہوئے کہا کہ کمپنی نے 4 ہفتوں پہلے کمپنی کے ملازمین کی کارکردگی ، صارفین کی ان تک رسائی اور ان کی ملاقاتوں کے حوالے سے ڈیٹا جمع کرنا شروع کیا تھا۔

وشال گارج نے بتایا کہ ہم نے اعداد و شمار کی روشنی میں یہ بات دیکھی کہ ہمارے صارفین وہ سہولیات حاصل ہی نہیں کررہے جو وہ کپمنی ملازمین سے حاصل کرنے کا حق رکھتے تھے۔