ناسا کے جیمز ویب اسپیس ٹیلی اسکوپ نے اپنے 18 شیشوں کے پرائمری آئینے کی ترتیب مکمل کرنے کے بعد  ایک زبردست تصویر لی ہے جو اس بات کی تصدیق کرتی ہے کہ یہ اسپیس کرافٹ اب ستاروں کی روشنی دیکھ سکتا ہے۔

اس نئی تصویر میں ایک سورج نما ستارے کی 18 بغیر فوکس کی نقول دیکھی جا سکتی ہیں۔ اس ستارے کا نام HD 84406 ہے جو اُرسا میجر نامی ستاروں کی جُھرمٹ میں موجود ہے۔

شش پہلو تصویر بالکل جیمز ویب اسپیس ٹیلی اسکوپ کے پرائمری آئینے کی ترتیب جیسی ہے۔

اس زبردست تصویر کے بعد جیمز ویب کے 21 فٹ کے پرائمری آئینے کی ترتیب کا پہلا مرحلہ مکمل ہوا۔ یہ آئینہ بیریلیم دھات کے سونے کا پانی چڑھے 18 شش پہلو ٹکڑوں پر مشتمل ہے۔

ٹیلی اسکوپ کا اگلا مرحلہ ان 18 تصاویر کو فوکس میں لانے کا ہوگا جس کے بعد ان 18 تصاویر کو ستارے کی ایک واضح تصویر بنایا جائے گا۔

جیمز ویب اسپیس ٹیلی اسکوپ کو گیانا اسپیس سینٹر سے کرسمس کے دن خلاء میں بھیجا گیا تھا۔

ٹیلی اسکوپ زمین سے 15 لاکھ کلو میٹر دور اپنے متعین کردہ مدار میں گزشتہ ماہ پہنچی تھی۔

10 ارب ڈالرز کی لاگت سے بنائی جانے والی یہ مشاہدہ گاہ فی الحال تین ماہ کے ترتیبی عمل سے گزر رہی ہے، جس کے بعد اس کو کائنات کے مشاہدے کے لیے استعمال کیا جا سکے گا۔

ناسا نے اپنے نئے بلاگ میں اس تصویر سے متعلق تفصیلات سے آگاہ کیا ہے۔