اقوامِ متحدہ کے ماہرین کا کہنا ہے کہ موسمیاتی تغیر پہلے ہی قدرت کو ناقابلِ تلافی نقصان پہنچا چکا ہے۔

ماہرین نے خبردار کیا ہےکہ اگر خطرناک گیسز کے اخراج کو تیزی سے کم نہیں کیا گیا تو گرمی چین ری ایکشنز کا سبب بن سکتی ہے جو ممکنہ طور پر انسانوں سمیت تمام جانداروں کے لیے تباہ کن ثابت ہوگا۔

موسمیات تغیر کے متعلق قائم بین الحکومتی پینل نے گلوبل وارمنگ پر اس ہفتے شائع ہونے والی نئی رپورٹ میں کہا کہ زمین پر موجود زندگی کی تمام اقسام ایک دوسرے سے عِلّت و نتائج کے وسیع جال کے ذریعے جُڑی ہوئی ہیں۔

یہ اثرات شدید ہیں اور دنیا بھر میں پھیلے ہوئے ہیں۔

آئی پی پی سی نے پالیسی سازوں کے لیے بنائی گئی سمری میں کہا کہ موسمیاتی تغیر عالمی سطح پر تازہ پانی اور ساحلی اور کھُلے آبی ماحول کو شدید اور ناقابلِ تلافی نقصان پہنچا چکا ہے۔

اور غیر پائیدار ڈیویلپمنٹ صرف خطرات میں اضافہ کر رہی ہے۔

کئی قدرتی نظام پہلے ہی گرم ہوتے سیارے کے اثرات سے نمٹنے کی اپنی صلاحیت کی حد تک پہنچ چکے ہیں یا پہنچنے کے قریب ہیں۔

اخراج میں اضافے کے ساتھ ہی سمندروں نے ماحول سے بڑی مقدار میں کاربن ڈائی آکسائیڈ جذب کرلی ہے، لیکن ایسا پانی کی کیمیات میں تبدلی کی قیمت پر ہوا ہے جس کی وجہ سے سمندری زندگی کو نقصان پہنچا ہے۔

گرمی کا تعلق متعدد طاقتور سمندری ہیٹ ویوز سے بھی ہے جو تیزی سے نقصان دہ کائی کے پھیلاؤ، مچھلیوں کی ہلاکت اور مونگوں کی بلیچنگ کا سبب بنتی ہے۔