عالمی ادارہ صحت کا کہنا ہے کہ دنیا کے 99 فی صد افراد ایسی ہوا کو سانس میں اندر لے رہے ہیں جس میں بہت زیادہ آلودہ مواد ہے۔

عالمی ادارہ صحت کی جانب سے بدتر معیار کی ہوا کو ہر سال لاکھوں اموات کا ذمہ دار بھی قرار دیا گیا۔

اقوامِ متحدہ کے ادارہ صحت کے تازہ ڈیٹا میں دِکھایا گیا کہ زمین کا ہر کونا فضائی آلودگی سے نمٹ رہا ہے۔ البتہ غریب ممالک میں صورتحال بدترین ہے۔

ایجنسی کی ماحولیات، موسمیاتی تغیر اور ہیلتھ ڈائریکٹر ماریہ نیئرا کا کہنا تھا کہ دنیا کی تقریباً 100 فی صد آبادی ایسی ہوا میں سانس لے رہی ہے جو عالمی ادارے کے تعین کردہ معیار سے کہیں زیادہ ہے۔

انہوں نے کہا کہ یہ عوام کی صحت کا ایک بڑا مسئلہ ہے۔

چار سال قبل جاری ہونے والی ایک رپورٹ میں عالمی ادارہ صحت کا کہنا تھا کہ دنیا کی 90 فی صد سے زائد آبادی اس سے متاثر ہے، لیکن تب سے ادارے نے پابندیوں کو سخت کیا ہے۔

عالمی ادارہ صحت نے کہا کہ فضائی آلودگی کے سبب ہونے والے نقصان کے شواہد تیزی سے بڑھ رہے ہیں۔

جبکہ اقوامِ متحدہ کے گزشتہ سال کے ڈیٹا میں بتایا گیا کہ عالمی وباء کے دوران ہونے والے لاک ڈاؤن اور سفری پابندیوں کے سبب ہوا کے معیار میں قلیل مدتی بہتری آئی تھی۔