ایپل کی جانب سے آپریٹنگ سسٹم میں 16.1 کے اپٹ ڈیٹ کے ساتھ آئی فون 14 میں ایک نیا فیچر متعارف کروادیا گیا ہے۔

اس فیچر میں وائی فائی کے بغیر میسیج بھیجنے کی سہولت موجود ہے، جسے بذریعہ سیٹلائٹ ایمرجنسی ایس او ایس کہا جاتا ہے۔

میڈیا رپورٹس کے مطابق آئی فون 14 سیریز سے ہم آہنگ اس فیچر کی بدولت صارفین ان علاقوں میں ایمرجنسی سروسز کے ساتھ رابطہ کر سکتے ہیں جہاں موبائل فون یا وائی فائی کے ذریعے رابطے کی سہولت موجود نہ ہو۔

میک رومز نامی جریدے میں شائع ہونے والی ایک تازہ سٹوری کے مطابق ایک شخص نے اس فیچر کو اس وقت آزمایا جب وہ امریکی ریاست الاسکا کے دیہی علاقے میں محصور ہو کر رہ گئے۔

یکم دسمبر کو الاسکا سٹیٹ ٹروپرز نے کہا کہ انہیں مذکورہ شخص کا پیغام موصول ہوا جو برف پر چلنے والی گاڑی میں نوروک سے کوٹزبیو کی طرف سفر کر رہے تھے، جہاں موبائل فون کے سگنل نہیں تھے۔

ایپل کے ایمرجنسی ریسپانس سینٹر کی ٹیم کا کہنا ہے کہ انہوں نے مقامی حکام اور امدادی ٹیموں اور نارتھ ویسٹ آرکٹک بیورو سرچ اینڈ ریسکیو کورآڈی نیٹر کے ساتھ مل کر کام کیا۔

انہوں نے جی پی ایس مقامات کی طرف متعدد رضاکار روانہ کیے جن کے بارے میں ایپل کو اس وقت اطلاع ملی جب مذکورہ شخص نے ایس او ایس پیغام بھیجا۔

جلد ہی امدادی حکام نے مذکورہ شخص کو اس جگہ کے خاصا قریب تلاش کیا جہاں سے انہوں نے اپنی لوکیشن شیئر کی تھی، اور انہیں کامیابی سے ریسکیو کر لیا گیا۔

ایپل کا کہنا ہے کہ سیٹلائٹ کے ذریعے رابطے کی سہولت ان مقامات پر دستیاب ہو سکتی ہے جہاں طول بلد 62 درجے سے زیادہ ہو۔

آئی فون 14 کے اس فیچر نے نوروک اور کوٹزبیو میں کسی رکاوٹ کے بغیر کام کیا جو 69 درجے طول بلد کے قریب ہیں۔

سیٹلائٹ کے ذریعے ایس او ایس فیچر فی الوقت آئی فون 14 کی پوری سیریز کے لیے دستیاب ہے۔

ایپل نے کہا ہے کہ یہ خصوصیت دو سال تک مفت استعمال کی جا سکتی ہے لیکن کمپنی نے ابھی تک یہ نہیں بتایا کہ دو سال بعد اس کی قیمت کیا ہو گی۔

واضح رہے کہ سیٹلائٹ کے ذریعے رابطے کی سہولت اس وقت صرف شمالی امریکہ تک محدود ہے تاہم جلد ہی یہ فرانس، آئرلینڈ، جرمنی، برطانیہ سمیت دوسرے ملکوں میں بھی دستیاب ہو گی۔