موجودہ دور میں مصروفیات کے باعث ہر شخص ہی جلدی میں رہتا ہے اور ہر کام کو جلد از جلد نمٹانا چاہتا ہے۔

موبائل جو ہر خاص و عام کی ناگزیر ضرورت بن چکا ہے اس کی چارجنگ بھی ایک مسئلہ ہے کہ اس کے لیے زیادہ نہ سہی لیکن کافی وقت درکار ہوتا ہے۔

موبائل فون کمپنیز نے وقت کی اہمیت کو مدنظر رکھتے ہوئے تیز چارجنگ کی سہولت فراہم کردی ہے لیکن عام طور پر یہ خیال کیا جاتا ہے کہ موبائل فون کی تیز چارجنگ سے موبائل فون کو نقصان پہنچ سکتا ہے تاہم اس تاثر میں کتنی حقیقت ہے یہ جاننا بہت ضروری ہے۔

گزشتہ چند برسوں میں تیز رفتار چارجنگ بہت زیادہ مقبول ہوئی ہے اور تمام ہی موبائل فون کمپنیز  اپنے موبائل فون کے ساتھ تیز ترین چارجنگ پوڈ فراہم کرتی ہیں۔

مزید پڑھیں: موبائل سم خریدنے والوں کیلئے اہم خبر؛ پی ٹی اے کا بڑا بیان آگیا

بعض لوگوں کا ماننا ہے کہ تیز چارجنگ کی افادیت اپنی جگہ لیکن اس سے اسمارٹ فون خاص طور پر بیٹریوں کو نقصان پہنچ سکتا ہے۔

دوسری جانب  ماہرین کا تیز چارجنگ سے موبائل فون کے نقصان کا خدشہ رد کرتے ہوئے کہنا ہے کہ صحیح طریقے سے تیز چارجر کا استعمال موبائل کو کوئی نقصان نہیں پہنچاتا۔

ماہرین کا کہنا ہے کہ زیادہ تر تیز چارجنگ سسٹمز خود بخود چارجنگ کی شرح کو ایڈجسٹ کرنے کی خوبی کے حامل ہوتے ہیں، اس سے موبائل فون کے گر م ہونے اور بیٹری کو نقصان سے بچانے میں مدد ملتی ہے۔

بہت سے تیز چارجنگ سسٹمز میں درجہ حرارت کے سینسر بھی ہوتے ہیں جو موبائل فون کو زیادہ گرم ہونے سے بچانے کے لیے چارجنگ کی اسپیڈ کو مزید منظم کر سکتے ہیں۔

مزید پڑھیں: گمشدہ موبائل فون ڈھونڈنا اب نہایت آسان، مگر کیسے؟

ماہرین کا ماننا ہے  کہ تیز چارجنگ صارفین  کا بہت سا قیمتی وقت بچالیتی ہے لیکن ضروری نہیں کہ یہ آپ کے اسمارٹ فون کو چارج کرنے کا سب سے موثر طریقہ ہو۔

تاہم جب تک آپ فاسٹ چارجنگ سسٹمز کو صحیح طریقے سے استعمال کرتے ہیں، اس وقت تک آپ فون کی بیٹری خراب ہونے کی فکر نہ کریں۔

موبائل چارجنگ کا  صحیح طریقہ

اس بات کا اطمینان کرلیں کہ جو چارجر آپ استعمال کرنے والے ہیں وہ آپ کے فون کو سپورٹ کرتا بھی ہے یا نہیں۔

بہتر طریقہ یہ ہے کہ چارجنگ کے وقت آپ موبائل فون سوئچ آف کردیں  یا کم از کم  وائی فائی، بلیو ٹوتھ اور اس طرح کے دیگر فیچرز بند کردیں۔

دوران چارجنگ فون استعمال کرنے سے گریز  کریں کیونکہ اس سے نہ صرف چارجنگ سست ہو جائے گی بلکہ موبائل فون خراب ہونے کا بھی خطرہ ہوتا ہے۔

اس بات کا خیال رکھیں کہ موبائل فون کو بار بار تھوڑے تھوڑے وقت کے لیے چارج پر نہ لگائیں بلکہ ایک ہی بار مکمل چارج کریں۔

ایئر پلین موڈ آن کرنے سے آپ کا موبائل نیٹ ورک سے رابطہ ختم ہوجاتا ہے، اس سے بیٹری کم استعمال ہوتی ہے اور چارجنگ کا عمل تیز ہوجاتا ہے۔