واٹس ایپ دنیا بھر میں سب سے زیادہ استعمال ہونے والی سماجی رابطے کی ایپلی کیشن ہے اور یہی وجہ ہے کہ واٹس ایپ تیزی سے ترقی کرتے ہوئے اپنے صارفین کو بہتر سہولیات فراہم کرنے کے لیے آئے دن نئے فیچر متعارف کرواتا رہتا ہے۔

اس بار واٹس ایپ نے ایسا دلچسپ فیچر متعارف کروایا ہے جس کے تحت صارفین کو اب پرانے میسجز ڈھونڈنے میں مشکلات کا سامنا نہیں ہوگا۔

یعنی اس فیچر کے ذریعے تاریخ کے مطابق کسی میسج کو تلاش کرنا ممکن ہوجائے گا۔

 یہ فیچر فی الحال آئی او ایس صارفین کو دستیاب ہے مگر آنے والے ہفتوں میں اینڈرائیڈ ڈیوائسز کے لیے بھی اسے متعارف کرائے جانے کا امکان ہے۔

آئی فونز صارفین ایپ اسٹور میں جا کر واٹس ایپ کو اپ ڈیٹ کر کے اس فیچر کو استعمال کرسکتے ہیں۔

فیچر کو استعمال کرنے کا طریقہ
اس فیچر کو استعمال کرنے کے لیے واٹس ایپ اوپن کرکے اس چیٹ ونڈو میں جائیں جہاں کسی مخصوص تاریخ کا میسج تلاش کرنا چاہتے ہیں۔

یہ بھی پڑھیں: واٹس ایپ نے اچانک ایسے فیچر کا اضافہ کردیا جس کا کروڑوں صارفین کو علم نہ ہوا

اس چیٹ ونڈو میں سرچ آپشن کو سلیکٹ کریں۔

سرچ آپشن سلیکٹ کرنے پر آپ کے سامنے کیلنڈر آئیکون آجائے گا جس پر کلک کریں۔

اس کے بعد مطلوبہ مہینے اور سال کو اسکرول کرکے منتخب کریں اور پھر جمپ ٹو ڈیٹ کے آپشن پر کلک کریں۔

ایسا کرنے کے بعد اس مخصوص تاریخ کے پیغامات سامنے آجائیں گے۔

واٹس ایپ کی جانب سے آئی او ایس صارفین کے لیے ڈریگ اینڈ ڈراپ فیچر بھی متعارف کرایا گیا ہے۔

یہ بھی پڑھیں: واٹس ایپ نے صارفین کی ایک اور بڑی مشکل آسان کر دی

اس فیچر کے ذریعے دیگر ایپس سے تصاویر، ویڈیوز اور دستاویزات سمیت کسی بھی میڈیا فائل کو ڈریگ (کھینچ کر) کرکے واٹس ایپ چیٹ ونڈو میں لانا ممکن ہوگا۔

اگر آپ آئی فونز استعمال کرتے ہیں مگر یہ نئے فیچرز ابھی دستیاب نہیں تو آئندہ چند روز میں آپ انہیں استعمال کرسکیں گے جبکہ اینڈرائیڈ صارفین کو ذرا زیادہ انتظار کرنا ہوگا۔