آئی فون دنیا بھر میں بہت مقبول اسمارٹ فونز ہیں لیکن اس کا ایک فیچر ایسا بھی ہے جس کا علم بہت کم افراد کو ہے۔

اکثر افراد کو نیند کے مسائل یا توجہ مرکوز کرنے میں مشکلات کا سامنا ہوتا ہے تو آئی فونز میں ایک ایسا فیچر موجود ہے جو ان مسائل کا حل ثابت ہو سکتا ہے۔

آئی او ایس 15 یا اس کے بعد کے آپریٹنگ سسٹمز پر کام کرنے والے آئی فونز میں بیک گراؤنڈ ساؤنڈز کے نام سے یہ فیچر موجود ہے۔

یہ بنیادی طور پر وائٹ نوائز فیچر ہے جو کسی آواز یا ساؤنڈ کے سکون پہنچانے والے تسلسل کو برقرار رکھتا ہے اور دیگر آوازوں کو بلاک کرتا ہے جس سے جلد سونے یا توجہ مرکوز کرنے میں مدد ملتی ہے۔

یہ بھی پڑھیں: ایپل کا آئی فون سے بھی جدید ’ڈیوائس‘ متعارف کرنے کا اعلان

فیچر کو استعمال کرنے کا طریقہ

اس فیچر کو استعمال کرنے کے لیے آئی فون میں سیٹنگز اور پھر Accessibility میں جاکر وہاں Audio/Visual آپشن پر کلک کریں۔

اس آپشن میں جاکر بیک گراؤنڈ ساؤنڈز کو ٹرن آن کر دیں، ایسا کرنے سے ایک سکون پہنچانے والی آواز فون سے خارج ہونے لگے گی جو نیند یا توجہ مرکوز کرنے میں مدد فراہم کرے گی۔

آپ متعدد آوازوں جیسے بارش، چشمہ بہنے اور سمندر سمیت دیگر کا انتخاب کرسکتے ہیں جبکہ والیوم کو ایڈجسٹ کر سکتے ہیں۔

یہ بھی پڑھیں: ایپل کا اب تک کا سب سے مہنگا ’الٹرا نامی‘ آئی فون متعارف کرانے پر غور

یہ بات ذہن میں رہے کہ اس فیچر کو ان ایبل کرنے کے بعد آپ کو خود اسے ٹرن آف کرنا ہوگا۔

اس فیچر کا شارٹ کٹ بھی بنایا جا سکتا ہے تاکہ ہر بار پورا عمل نہ دہرانا پڑے۔