چیٹ جی پی ٹی ایسا آرٹی فیشل چیٹ بوٹ ہے جو بہت تیزی سے دنیا بھر میں مقبول ہوا ہے۔

امریکی کمپنی اوپن اے آئی کے تیار کردہ اس اے آئی چیٹ بوٹ نے ٹیکنالوجی کی دنیا کو بدل کر رکھ دیا ہے کیونکہ اب زیادہ تر بڑی کمپنیاں اسی ٹیکنالوجی کو بہتر بنانے کے لیے کام کر رہی ہیں۔

مگر کیا کبھی آپ نے سوچا کہ چیٹ جی پی ٹی میں جی پی ٹی کا مطلب کیا ہے؟

اس کا جواب ہم نے براہ راست چیٹ جی پی ٹی پر ہی جاکر معلوم کیا جس کے مطابق جی پی ٹی لفظ جنریٹیو پری ٹرینڈ ٹرانسفارمر کا مخفف ہے۔

اس مکمل نام سے وضاحت ہوتی ہے کہ یہ اے آئی چیٹ بوٹ کیا کام کرتا ہے۔

جنریٹیو سے مراد اے آئی ٹیکنالوجی کی ٹیکسٹ جنریٹ کرنے کی صلاحیت ہے، یعنی جب آپ اس سے کچھ پوچھتے ہیں تو وہ ٹیکسٹ میں جواب دیتا ہے۔

پری ٹرینڈ کا مطلب یہ ہے کہ چیٹ جی پی ٹی کی کافی زیادہ ٹریننگ کی گئی ہے، لینگوئج ماڈل کے ذریعے ڈیٹا اس سروس کا حصہ بنایا گیا اور اسی سے چیٹ جی پی ٹی کو انسانی زبان سمجھنے اور اس کے مطابق جواب دینے میں مدد ملتی ہے۔

جہاں تک ٹرانسفارمر کی بات ہے تو اس سے مراد کمپنی کی جانب سے استعمال کیے جانے والا نیورل نیٹ ورک architecture ہے۔

اسی سے چیٹ بوٹ کو کسی جملے میں شامل الفاظ کا تعلق سمجھنے میں مدد ملتی ہے۔