عالمی ٹیکنالوجی کمپنی مائیکروسافٹ نے پاکستان میں اپنے 25 سالہ آپریشنز کو مکمل طور پر بند کرنے کا فیصلہ کرلیا ہے۔

رپورٹس کے مطابق مائیکروسافٹ کمپنی نے اپنے باقی ماندہ چند ملازمین کو حال ہی میں باضابطہ طور پر مطلع کیا ہے کہ وہ پاکستان میں اپنے تمام آپریشنز کو بند کر رہی ہے۔

اس بندش کو ’’ایک دور کا اختتام‘‘ قرار دیتے ہوئے مائیکروسافٹ پاکستان کے بانی کنٹری مینیجر جواد رحمان نے کہا کہ کمپنی کے پاکستان سے انخلا کے ساتھ ہی ایک یادگار اور تعمیراتی دور اپنے انجام کو پہنچا ہے۔

سات سال تک پاکستان میں مائیکروسافٹ کی قیادت کرنے والے جواد رحمان نے کہا ’’یہ صرف ایک نوکری نہیں تھی بلکہ ایک مشن تھا۔ ان سالوں میں لوگوں کی زندگی بہتر بنانے، شراکت داری قائم کرنے، اعتماد جیتنے اور پاکستانی نوجوانوں کے لیے مواقع پیدا کرنے کی کوشش کی گئی ہے‘‘۔

دور افتادہ علاقوں میں سینکڑوں کمپیوٹر لیبز قائم کیں

پاکستان میں اپنی موجودگی کے دوران مائیکروسافٹ نے دور دراز علاقوں میں سیکڑوں کمپیوٹر لیبز قائم کیں جن کا مقصد ڈیجیٹل خواندگی کو فروغ دینا اور تعلیم کے مواقع فراہم کرنا تھا۔

معاشی عدم استحکام اور ڈیجیٹل خلا میں اضافہ

مائیکروسافٹ کا انخلا ایسے وقت میں ہو رہا ہے جب پاکستان شدید معاشی دباؤ، سیاسی بے یقینی اور ڈیجیٹل تقسیم جیسے چیلنجز سے دوچار ہے۔

جہاں ایک وقت میں پاکستان کو ٹیکنالوجی سرمایہ کاری کا ابھرتا مرکز سمجھا جاتا تھا، وہیں اب متعدد عالمی کمپنیاں یا تو اپنا دائرہ محدود کر رہی ہیں یا مکمل طور پر پاکستان سے جا رہی ہیں۔

ویتنام کو ترجیح دی گئی

 2022میں مائیکروسافٹ نے پاکستان میں اپنے آپریشنز کو وسعت دینے پر غور کیا تھا تاہم سیاسی بحران کے باعث کمپنی نے اپنا فوکس ویتنام کی جانب منتقل کردیا۔