بیجنگ انسٹیٹیوٹ آف ٹیکنالوجی کے سائنسدانوں نے ایک 74 ملی گرام وزنی انسیکٹ برین کنٹرولر (حشرات کے دماغ کو کنٹرول کرنے والے آلے) کا استعمال کرتے ہوئے دنیا کی پہلی ’’سائبورگ‘‘ شہد کی مکھی تیار کرلی ہے۔

غیر ملکی ویب سائٹ کے مطابق کام کرنے والی شہد کی مکھیاں اپنے جسمانی وزن کے 80 فیصد کے برابر شہد جمع کرنے والی تھیلی اٹھا کر بغیر رکے 5 کلومیٹر (تقریباً 3 میل) تک اُڑ سکتی ہے، اس لیے چینی سائنسدانوں کا بنایا ہوا 74 ملی گرام وزنی کنٹرولر اٹھانا اس کے لیے کوئی مسئلہ نہیں۔

یہ نیا اور انتہائی ہلکا آلہ مکھی کی کمر سے بآسانی باندھا اور تین نہایت باریک سوئیوں کے ذریعے اس کے دماغ سے منسلک کیا جاسکتا ہے، جس سے انسان اس کی حرکات کو کنٹرول کر سکتے ہیں، یہ کنٹرولر کم شدت کی برقی لہروں کے ذریعے مکھیوں کو بائیں، دائیں، آگے یا پیچھے موڑنے کے احکامات دیتا ہے۔

پروفیسر ژاؤ جیلیانگ کے مطابق ان کی ٹیم کی طرف سے اب تک کیے گئے ٹیسٹوں میں مکھیوں نے 10 میں سے 9 بار ان کے احکامات پر عمل کیا۔

پروفیسر ژاؤ نے گزشتہ ماہ ایک تحقیقی مقالے میں لکھا’’کیڑے پر مبنی روبوٹس اپنے حیاتیاتی میزبانوں کی بہترین حرکت پذیری، ماحول سے ہم آہنگی، اور چھپنے کی صلاحیت وراثت میں حاصل کرتے ہیں۔ مصنوعی روبوٹس کی نسبت یہ زیادہ چُھپ کر کام کرنے اور زیادہ دیر تک چلنے کی صلاحیت رکھتے ہیں، جو کہ شہری جنگ، انسداد دہشت گردی، منشیات کے خلاف کارروائیوں اور قدرتی آفات میں مدد کے لیے نہایت معاون ثابت ہو سکتے ہیں۔‘‘

یہ بھی پڑھیں: شہد کی مکھیاں انسانوں جیسا کیا کام کرسکتی ہیں؟