نیویارک: ایک نیورو سائنس سے متعلق کمپنی نے ایسا منفرد اسمارٹ فون کیس تیار کیا ہے جس کے بارے میں دعویٰ کیا گیا ہے کہ یہ صارفین کا اسکرین ٹائم تقریباً نصف تک کم کر دے گا۔

غیر ملکی میڈیا کے مطابق کمپنی نے 2.7 کلوگرام (6 پاؤنڈ) وزنی فون کیس متعارف کرایا ہے جو جان بوجھ کر بھاری اور غیر آرام دہ بنایا گیا ہے تاکہ صارفین موبائل کے غیر ضروری استعمال سے باز رہیں۔

عام طور پر اسمارٹ فون کیسز ہلکے اور خوبصورت ڈیزائن کے حامل ہوتے ہیں، تاہم اس کمپنی نے اس کے برعکس راستہ اختیار کرتے ہوئے دنیا کا سب سے بھاری اور بڑا فون کیس متعارف کرایا ہے۔

کمپنی کے مطابق اس اقدام کا مقصد موبائل فون کے استعمال کو مشکل، غیر آرام دہ اور جسمانی طور پر تھکا دینے والا بنانا ہے۔

اسٹین لیس اسٹیل سے تیار کردہ یہ فون کیس دو حصوں پر مشتمل ہے جنہیں اسکرو کے ذریعے جوڑا جاتا ہے۔ حیرت انگیز طور پر اس کا وزن 16 انچ میک بک پرو لیپ ٹاپ سے بھی زیادہ ہے۔

کمپنی کا کہنا ہے کہ جتنا زیادہ کوئی شخص فون چیک کرے گا، اتنا ہی وہ جسمانی تھکن محسوس کرے گا، جو بالآخر فون کے استعمال کو کم کر دے گی۔

دلچسپ بات یہ ہے کہ کمپنی نے مزاحیہ انداز میں کہا ہے کہ اگر کوئی شخص ورزش کا شوقین ہے تو وہ اسے ڈمبل کے طور پر بھی استعمال کر سکتا ہے، کیونکہ اس کا وزن پٹھوں کو مضبوط بنانے میں مدد دے گا۔

اگرچہ اس بھاری کیس کو فون سے اتارنا ممکن ہے، مگر اس کے لیے رنچ درکار ہوتا ہے، جو عمل اتنا وقت طلب اور غیر سہل ہے کہ زیادہ تر صارفین ایک بار لگانے کے بعد اسے ہٹانے سے گریز کریں گے۔

یہ منفرد فون کیس فی الحال فنڈنگ مرحلے میں ہے اور اسے 210 ڈالر میں پری آرڈر کیا جا سکتا ہے جبکہ پیتل کے ورژن کی قیمت 500 ڈالر ہے جو اس سے بھی زیادہ بھاری ہے۔

مزید پڑھیں: جب اسمارٹ فون ٹیبل پر ہو تو اسے ہمیشہ الٹا رکھیں، وجہ انتہائی حیران کن