ہر انسان اپنی طبیعت کی مناسبت اور عادت کے مطابق لیٹنا یا سونا پسند کرتا ہے۔

جوان انسان ہو یا بوڑھا یہاں تک کہ ایک جانور بھی اپنی مرضی کے مطابق جیسے سکون محسوس کرتا ہے وہ ویسے سو جاتا ہے۔

آپ نے اکثر دیکھا ہوگا کہ چھوٹے بچوں کو سیدھا سلایا جاتا ہے کیونکہ سائنسی اعتبار سے سیدھا سونے سے بچوں کی نشونما میں تیزی سے اضافہ ہوتا ہے۔

بچوں کو تو زبردستی کر کے باندھ کر یا بار بار ٹھیک کر کے ان کی کروٹ میں تبدیلی کی جاسکتی ہے لیکن بڑوں پر کس کی زبردستی چلتی ہے اسی لئے صرف سائنس ہی غلط طرح سے سونے پر انسان کی اصلاح کرسکتی ہے۔

ہم کس پوزیشن میں سوتے ہیں اس کا ہمارے سکون، آرام اور صحت سے ایک بڑا تعلق ہے کیونکہ سونے کی غلط پوزیشن کی وجہ سے ہمارے جسمانی اعضاء پر دباؤ پڑتا ہے جو بہت نقصان دہ بھی ثابت ہو سکتا ہے۔

البتہ کسی بھی ایک پوزیشن میں رات بھر سونا بھی ٹھیک نہیں ہے اس سے جسم سُن ہو جاتا ہے اور پھر تکلیف ہوتی ہے۔

1۔ سائنس کے مطابق سونے کی سب سے بہترین پوزیشن ہے کہ آپ کمر کے بل سوئیں کیونکہ اس سے آپ کی ریڑھ کی ہڈیاں اسٹیبل پوزیشن میں رہتی ہیں اور جسم کو سکون ملتا ہے اگر آپ کو نزلہ کھانسی اور زکام ہے تو ایسے میں کمر کے بل سونا آپ کے لئے سب سے بہتر ہے۔

2۔ اگر آپ پوری رات کمر کے بل نہیں سو سکتے تو اپنے گھٹنے کے نیچے ایک تکیہ رکھیں اور پرسکون ہو کر کروٹ سے سوجائیں، اس سے آپ کی کمر، کولہوں اور ٹانگوں کو درد دور ہوگا اور آپ کو قدرتی طور پر آرام آئے گا۔

3۔ اکثر لوگ عجیب طرح سوتے ہیں اور پھر گردن کمر یا سر درد کی شکایت کرتے ہیں انہیں خود کو موڑ توڑ کو سونا پسند ہوتا ہے ایسے میں اگر یہ دونوں ٹانگوں کو موڑ کر سوئیں تو یہ پوزیشن ان کی صحت کے لئے زیادہ بہتر ہوگی اور انہیں جسم میں درد کی شکایت بھی نہیں رہے گی۔