بحیرہ عرب میں نئے سمندری  طوفان  ماہا نے شدت اختیار  کرلی ہے۔سائیکلون کیٹگری ون کے سمندری طوفان میں تبدیل ہوچکا   ہے۔

تفصیلات کے مطابق   محکمہ موسمیات  کا کہناہے کہ ابتدائی طور پر  اس کا رخ شمال مغرب کی جانب ہے۔ کراچی سے 1600 کلومیٹر دور ہے۔

محکمہ موسمیات کے مطابق آنے والے دنوں میں طوفان  مزید شدت اختیار کرسکتا ہے۔ ڈائریکٹر محکمہ موسمیات سردار سرفراز نے بتایا کہ سائیکلون ماہا کراچی کے جنوب مشرق 1600 کلومیٹر دور ہے جس کے مرکز میں ہوائیں 90 سے 110کلومیٹر فی گھنٹہ کی رفتار سے چل رہی ہیں۔

انہوں نے کہا کہ  آئندہ 24گھنٹوں کے دوران سائیکلون ماہا کی شدت میں مزید اضافے کا امکان ہے۔

دوسری جانب سائیکلون کیار بتدریج کمزور ہورہا ہے ۔ ڈائریکٹر محکمہ موسمیات سردار سرفراز  نے بتایا کہ بحیرہ عرب میں دوسرا بڑا سپر سائکلون کیار دم توڑ رہا ہےاور  آج دوپہر تک یہ  سمندر میں ہی دم توڑ دے گا۔ کیار، کراچی سے 1030 کلومیٹر دور ہے۔

سمندری طوفان خلیج عدن کی طرف  بڑھ رہا ہے۔ صومالیہ کے ساحل سے ٹکرا سکتا ہے ۔

یاد رہے کہ طاقتور ترین سمندری طوفان ’کیار‘ پاکستان سے ٹکرائے بغیر عمان طرف رُخ کرگیا لیکن طوفان نے 700 کلومیٹر کے فاصلے سے ہی سندھ اور بلوچستان کے سمندر میں طغیانی پیدا کردی تھی جس سے ساحلی بستیاں زیر آب آگئ تھیں۔