محکمہ موسمیات نےآج ملک کے بیشترعلاقوں میں موسم سرد اور خشک رہنےکاامکان ظاہر کیاہےجبکہ شمال مغربی بلوچستان، بالائی خیبرپختو نخوا، کشمیر اور گلگت بلتستان میں متعدد مقامات پر گرج چمک کے ساتھ بارش اور پہاڑوں پرہلکی برفباری کی پیشگوئی بھی کی ہے۔

تفصیلات کے مطابق محکمہ موسمیات کاکہناہے کہ منگل کی صبح ہلکے بادل چھائے رہے اور سردی کی شدت میں بھی اضافہ ریکارڈ کیا گیا۔ صبح کے وقت اسلام آباد کا درجہ حرات 10 ڈگری سینٹی گریڈ ریکارڈ کیا گیا جو زیادہ سے زیادہ 18 تک جا سکتا ہے۔

محکمہ موسمیات کے مطابق صوبہ بلوچستان کےبیشتر اضلاع میں موسم سرد اورخشک رہے گا تاہم کوئٹہ، پشین، قلعہ عبداللہ، چاغی اور تربت کے اضلاع میں چند مقامات پر ہلکی بارش ہوسکتی ہے۔

 منگل کے روز خیبرپختونخوا، آزاد کشمیر اور گلگت بلتستان میں موسم ابر آلود رہنے کا امکان ہے۔ دیر، سوات، چترال، پشاور، ایبٹ آباد اور ہزارہ کے اضلاع میں چند مقامات پر ہلکی بارش اور پہاڑوں پر برفباری متوقع ہے۔

محکمہ موسمیات کے مطابق پنجاب کے اضلاع نارووال، سیالکوٹ،گوجرانوالہ ، لاہور اور بہاولپور کے اضلاع میں صبح کے وقت ہلکی دھند پڑنے کا امکان ہے تاہم دیگر علاقوں میں موسم سرد اور خشک رہے گا۔

سندھ کے بیشتر اضلاع میں موسم خشک رہے گا تاہم بالائی سندھ میں چند مقامات پر صبح کے اوقات میں ہلکی دھند چھائے رہنے کا امکان ہے۔

گزشتہ 24 گھنٹوں کے دوران ملک کے بیشتر علاقوں میں موسم خشک اور سرد جبکہ شمالی علاقوں میں شدید سرد رہا۔ سب سے زیادہ سردی استور اور اسکردو میں پڑی جہاں کا درجہ حرارت منفی 8 ڈگری سینٹی گریڈ ریکارڈ کیا گیا۔