کراچی کے مکینوں کے لئے بارشوں کے حوالے سے ایک اور خبر سامنے آگئی ہے جس کے مطابق سندھ میں مون سون بارشوں کا نیا اور چھٹا اسپیل پہلے سے ہی   موجود ہے۔

تفصیلات کے مطابق خلیج بنگال میں بننے والا ہوا کا شدید کم دباؤ اس وقت راجستان کے مغرب میں موجود ہے، ہوا کا یہ کم دباؤ آج سے سندھ کے مختلف علاقوں میں خصوصاً جنوب مشرقی سندھ میں اپنا اثر دکھانے لگے گا۔

اس نئے اسپیل کے باعث سندھ کے مختلف علاقوں میں بارشوں کا شدید امکان ہے۔

جن علاقوں میں شدید بارشوں کا امکان ہے اس میں تھرپارکر اور بدین کے تمام علاقے شامل ہیں جس کی وجہ سے سیلابی صورتحال کا سامنا کرنا پڑ سکتا ہے جبکہ ​​میر پور خاص، عمرکوٹ، سانگھڑ، ​​سکھر، لاڑکانہ، ٹھٹھہ، دادو ، شہید بینظیرآباد ، حیدرآباد اور کراچی کے اضلاع آج اور کل سے تین دن تک گرج چمک کے ساتھ بارشیں متوقع ہیں۔

دوسری جانب شہر قائد میں گرج چمک کے ساتھ درمیانی سے تیز اور مخلتف علاقوں میں موسلادھار بارش کے امکانات ہیں۔

کراچی شہر کے مختلف علاقوں میں آج شام سے لے کر اگلے 3 دن تک وقفے وقفے سے گرج چمک کے ساتھ بارش ہونے کے امکانات موجود ہیں۔

مون سون ہواؤں کی وجہ سے کراچی شہر میں بدھ تک امکانات موجود ہیں۔ کچھ علاقوں میں تیز بارشوں کی وجہ سے اربن فلڈنگ بھی ہوسکتی ہے۔