محکمہ موسمیات کی جانب سے متوقع تیز ہوا اور بارشوں کی پیشگوئی پر جناح انٹرنیشنل ایئرپورٹ پر الرٹ جاری کردیا گیا ہے۔

تفصیلات کے مطابق   سول ایوی ایشن اتھارٹی ( سی اے اے)  کے شعبہ ایئر سائڈ نے محکمہ موسمیات کی جانب سے متوقع تیز ہوا اور بارشوں کی پیشگوئی پر جناح انٹرنیشنل ایئرپورٹ پر الرٹ جاری کردیا ہے۔

سی اے اے کی جانب سے تما م متعلقہ محکموں کے عملے کو کسی بھی ہنگامی صورتحال سے نمٹنے کے لیے اقدامات کرنے کی ہدایت کردی گئی ہے۔

سی اے اے نے  متوقع بارشوں کے حوالے سے جناح ٹرمینل اور ٹرمینل ون پر اقدامات شروع کرتے ہوئے  جہازوں اور کھلے سامان کو محفوظ مقامات پر منتقل کرنے کے احکامات  بھی جاری کردیے ہیں۔

سی اے اے حکام کا کہنا ہے کہ  ائیرپورٹ کے رن وے پر بارشوں کے وقت خصوصی نگرانی کے احکامات جاری کردیے گئے ہیں۔  ایم یو کی خصوصی ٹیم رن وے کا سروے کر ے گی اور اس بات کا تعین کرے گی کہ رن وے طیاروں کے لیے محفوظ ترین ہے۔

سی اے اے حکام کا کہنا ہے کہ بارشوں کے بعد  پرندوں کی نقل و حمل میں اچانک سے اضافہ ہوجاتا ہے ان کے خاتمے کے لیے بھی اقدامات کیےگئے ہیں ۔

ایئر پورٹ مینجر عمران خان کا کہنا ہے کہ  چھوٹے سائز کے طیاروں اور ہیلی کاپٹرز کے ساتھ اضافی وزن لگا دیے گئے ہیں ۔طیاروں کی حفاظت کے پیش نظر ہر قسم کے اقدامات کر لیے گئے ہیں۔