کراچی: دنیا کے آلودہ ترین شہروں کی فہرست میں پاکستان کا شہر کراچی پہلے نمبر پر آگیا۔

تفصیلات کے مطابق کراچی میں ہواؤں کی سمت تبدیل ہوگئی ہے، شہر میں شمال مغربی ہواؤں کا راج ہے جس کی وجہ سے دنیا بھر میں فضائی آلودگی کی فہرست میں کراچی صف اول آگیا۔

ایئر کوالٹی انڈیکس کے مطابق کراچی کی فضا کو مضر صحت قرار دیا گیا ہے جبکہ شہر کی فضا میں آلودہ زرات کی مقدار 207 پرٹیکیولیٹ میٹر ریکارڈ کی گئی ہے۔

اس کے علاوہ لاہور دنیا کا تیسرا آلودہ ترین شہر قرار دیا گیا ہے جبکہ شہر کی فضا میں آلودہ زرات کی مقدار 158 پرٹیکیولیٹ میٹر تک پہنچ گئی۔

ماہرین کا کہنا ہے کہ شہری گھروں سے باہر نکلتے وقت ماسک ضرور لگائیں۔

کراچی کا موسم

کراچی میں موسم آج گرم اور مرطوب رہے گا جبکہ شہر کا کم سے کم درجہ حرارت 25.7 ڈگری ریکارڈ کیا گیا اور زیادہ سے زیادہ پارہ 36 ڈگری تک رہنے کا امکان ہے۔

محکمہ موسمیات کے مطابق شہر میں ہوا میں نمی کا تناسب اوسطاً 71 فیصد تک رہے گا جبکہ اس وقت سمندری ہوائیں معطل ہیں اور شہر میں 2 کلو میٹر فی گھنٹہ کی رفتار سے مشرقی ہوا چل رہی ہے۔

دوسری جانب سندھ کے دیگر اضلاع میں موسم گرم اور خشک رہنے کا امکان ہے جبکہ جیکب آباد، دادو، لاڑکانہ، سکھر، خیر پور، شہید بینظیر آباد میں پارہ 36 سے 39 ڈگری تک رہنے کا امکان ہے۔

علاوہ ازیں حیدرآباد، میر پور خاص، مٹھی میں درجہ حرارت 34 سے 37 ڈگری کے درمیان رہنے کی توقع ہے اور بدین، ٹھٹھہ، سجاول میں پارہ 33 سے 35 ڈگری تک رہنے کا امکان ہے۔

محکمہ موسمیات نے مزید بتایا کہ صوبے بھر میں مطلع صاف رہے گا جبکہ بارش کا کوئی امکان نہیں ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔