محکمہ موسمیات نے گرج چمک کے ساتھ بارش کی پیشگوئی کر دی ہے۔

تفصیلات کے مطابق محکمہ موسمیات نے خیبر پختونخوا، گلگت بلتستان اور بلوچستان میں گرج چمک کے ساتھ بارش اور پہاڑوں پر برفباری کی پیشگوئی کی ہے۔

 جبکہ پنجاب اور خیبر پختونخوا کے بعض میدانی علاقوں اور بالائی سندھ کے مختلف علاقوں میں رات کو دھند کی پیشگوئی کی گئی ہے۔

محکمہ موسمیات کے مطابق ملک کے بیشتر میدانی علاقوں میں موسم سرد اور خشک جبکہ مختلف بالائی علاقوں میں مطلع جزوی ابرآلود رہنے کا امکان ہے۔

کوئٹہ، قلات، زیارت، چمن، قلعہ سیف اللہ، قلعہ عبداللہ، دیر، چترال، سوات، کوہستان، وزیرستان اور کرم میں بارش کا امکان ظاہر کیا گیا ہے۔

چاغی، تربت، پنجگور، نوکنڈی، دالبندین،ژوب اور گلگت بلتستان میں بارش اور پہاڑوں پر برفباری متوقع ہے جبکہ اسلام آباد میں موسم سرد اور مطلع جزوی ابر آلود رہنے کا امکان ظاہر کیا گیا ہے۔

چمن اور توبہ اچکزئی میں بارش کا آغاز ہو گیا ہے جس سے وہاں سردی کی شدت میں مزید اضافہ ہو گیا ہے۔

محکمہ موسمیات کے مطابق مری، گلیات اورگردو نواح میں مطلع جزوی ابر آلوداورسرد رہے گا، نارووال، سیالکوٹ، اوکاڑہ، ساہیوال، گوجرانوالہ، سرگودھا اور لاہور دھند کی لپیٹ میں رہیں گے۔

فیصل آباد، ٹوبہ ٹیک سنگھ، جھنگ، خانیوال، ملتان، بہا ولپور، خان پور، رحیم یار خان،ڈیرہ غازی خان کے مختلف علاقوں میں بھی دھند رہنے کی پیشگوئی کی گئی ہے۔

اس کے علاوہ جیکب آباد، موہنجوداڑو، سکھر، لاڑکانہ، دادو، گھوٹکی اور پڈعیدن میں دھند جبکہ پشاور، چارسدہ، نوشہرہ، مردان اور صوابی کے مختلف علاقے بھی دھند کی لپیٹ میں رہیں گے۔