بحیرہ عرب کےشمال مشرق میں موجود سمندری طوفان اسنیٰ کا فاصلہ مذید بڑھ کر230 کلومیٹرہوگیا۔

محکمہ موسمیات کے مطابق سمندری طوفان کا فاصلہ بلوچستان کے ساحلی مقام اورماڑہ سے 180 کلومیٹرجبکہ گوادرسے 300 کلومیٹر کے لگ بھگ ہے، جبکہ گذشتہ 6 گھنٹوں کےدوران طوفان مزید مغرب کی جانب بڑھا ہے، اور یہ مزید مغرب، جنوب مغرب کی جانب بڑھےگا۔

جنوبی، مغربی سندھ میں مون سون کی معتدل ہوائیں داخل ہورہی ہیں، جس کی وجہ سے کراچی میں آج مطلع ابرآلود رہنے اور تیزہواوں کے ساتھ بارش کا امکان ہے جبکہ شہر کے چند مقامات پرموسلادھاربارشیں ہوسکتی ہیں، سمندرمیں طغیانی رہے گی، تاہم ہمارے ساحل کوکوئی خطرہ نہیں، کل سے شہر کا موسم بہتر ہوجائے گا۔، اس کے علاوہ دیہی سندھ کے مختلف اضلاع میں گرج چمک کے ساتھ تیز اور موسلادھاربارشوں کا امکان ہے۔

سردار سرفرازکا کہنا ہے کہ طوفان جنوب مغربی سمت کی جانب گامزن ہے، جبکہ طوفان کا رخ بلوچستان اور عمان کی ساحلی پٹی کی جانب ہے، جبکہ طوفان کی شدت عمان کے ساحل پر پہچنے سے قبل ہی کمزور ہونے کا امکان ہے۔

 سردارسرفراز کے مطابق بلوچستان کے مختلف علاقوں میں بھی آج کہیں ہلکی اور کہیں تیز بارش ہوگی، ماہی گیرآج اورکل سمندرمیں جانےسےگریزکریں۔

محکمہ موسمیات کا کہنا ہے کہ طوفان اسنیٰ کے زیراثر شہرمیں آج دن بھروقفےوقفےسے تیزبارش ہوگی، بدین، ٹھٹھہ، سجاول اور حیدرآباد میں بھی کہیں ہلکی کہیں تیزبارش کاامکان ہے۔