بھارتی رن آف کچھ اور تھرپارکر کے قریب بننے والا مون سون کا طاقت ورسسٹم آج کراچی اور حیدرآباد میں داخل ہوجائے گا۔

محکمہ موسمیات نے کہا ہے کہ کراچی میں 3 دنوں کے دوران ڈیڑھ سے 2 سو ملی میٹر بارش ہوسکتی ہے اور اربن فلڈنگ کا بھی خدشہ ہے جبکہ آج دوپہر سے کراچی، حیدرآباد اور دیگر اضلاع میں آندھی اور گرج چمک کے ساتھ موسلادھار بارش کا امکان ہے۔

محکمہ موسمیات کے مطابق نئے سسٹم کے تحت 31 اگست تک وقفےوقفے سے بارش جاری رہے گی جبکہ اندرون سندھ میں بھی گزشتہ روز سے موسلادھار بارشوں کا سلسلہ جاری ہے۔

ٹھٹھہ، مٹیاری، بدین، تھرپارکر میں بھی طوفانی بارش ہوئی جبکہ سانگھڑ، دادو، نواب شاہ اور میرپورخاص میں بھی بادل خوب گرجے برسے۔

محکمہ موسمیات نے بتایا کہ شاہراہیں اور نشیبی علاقہ زیر آب آگئے، جامشورو اور کوٹری میں بارش سے مواصلاتی نظام اور فراہمی و نکاسی آب کا نظام درہم برہم کردیا اور کئی علاقوں میں بجلی بھی غائب ہوگئی۔

سندھ کے مختلف شہروں میں موسلادھار بارشوں سے سڑکیں تالاب کا منظر پیش کرنے لگیں، پانی لوگوں کے گھروں میں داخل ہو گیا جس کے باعث انہیں شدید مشکلات کا سامنا کرنا پڑ رہا ہے۔