کراچی کے مختلف علاقوں میں صبح سویرے بوندا باندی کے بعد موسم خوشگوار ہوگیا۔

محکمہ موسمیات کے مطابق شہر کے مختلف علاقوں میں وقفے وقفے سے ہلکی بارش کا سلسلہ جاری ہے، جس سے گرمی کا زور کم ہو گیا ہے۔

کراچی کے علاقے کلفٹن، ڈیفنس، سی ویو، صدر، زینب مارکیٹ اور ملحقہ علاقوں میں بونداباندی ہوئی، جس کے باعث ٹھنڈی ہوائیں چلنے لگیں اور شہریوں نے سکھ کا سانس لیا، تاہم اب بھی شہر میں بادلوں کے ڈیرے اور مطلع ابر آلود ہے۔

محکمہ موسمیات نے بتایا ہے کہ شہر میں شام کے اوقات میں بھی بونداباندی متوقع ہے جبکہ تیز بارش کا کوئی امکان نہیں ہے۔

دوسری جانب محکمہ موسمیات نے ملک کے مختلف حصوں میں آج مزید بارشوں کی پیشگوئی کی ہے، تاہم خیبر پختونخوا، کشمیر، پنجاب اور اسلام آباد میں کہیں کہیں تیز ہواؤں اور گرج چمک کے ساتھ بارش کا امکان ظاہر کیا گیا ہے۔

محکمہ موسمیات کے مطابق شمال مشرقی اور جنوبی بلوچستان، جبکہ جنوب مشرقی سندھ میں بھی بارش کے ساتھ تیز ہوائیں چل سکتی ہیں۔

علاوہ ازیں کشمیر، بالائی پنجاب، اسلام آباد اور خطہ پوٹھوہار میں چند مقامات پر موسلادھار بارش متوقع ہے۔

خیبر پختونخوا اور شمالی بلوچستان میں بھی بعض مقامات پر تیز یا موسلادھار بارش ہو سکتی ہے جبکہ ملک کے دیگر علاقوں میں موسم گرم اور مرطوب رہنے کا امکان ہے۔