اندرون سندھ کے مختلف شہروں میں جاری موسلادھار بارشوں نے معمولاتِ زندگی کو شدید متاثر کردیا ہے جبکہ کئی علاقوں میں نشیبی مقامات زیرِ آب آ گئے اور بجلی و مواصلاتی نظام بھی درہم برہم ہو گیا ہے۔

ٹنڈو محمد خان، حیدرآباد، روہڑی، پڈعیدن، لاڑکانہ، نوشہروفیروز اور جوہی سمیت متعدد شہروں میں بارش کا سلسلہ وقفے وقفے سے جاری ہے۔

 تیز ہواؤں اور گرج چمک کے ساتھ ہونے والی بارش نے ایک طرف موسم کو خوشگوار بنا دیا ہے، تو دوسری جانب شہریوں کو کئی مشکلات کا سامنا بھی کرنا پڑ رہا ہے۔

ٹنڈو محمد خان

شہر میں تیز ہواؤں کے ساتھ موسلادھار بارش کے باعث نشیبی علاقے زیرِ آب آ گئے۔

حیسکو کی جانب سے احتیاطی طور پر بجلی کی فراہمی بند کر دی گئی، جس سے شہریوں کو پریشانی کا سامنا کرنا پڑا جبکہ مواصلاتی نظام بھی متاثر ہوا ہے۔

حیدرآباد

شہر اور گرد و نواح میں ہلکی اور تیز بارش کا سلسلہ وقفے وقفے سے جاری ہے۔

بارش کے باعث کئی علاقوں میں بجلی معطل ہو گئی جبکہ سڑکوں پر پانی جمع ہونے سے ٹریفک کی روانی متاثر ہوئی۔

روہڑی

روہڑی میں بھی بارش کے دوران شہر بھر میں بجلی کی فراہمی معطل ہو گئی، جس سے شہریوں کو شدید مشکلات کا سامنا ہے۔ نشیبی علاقوں میں پانی جمع ہونے سے صورتحال مزید خراب ہو گئی ہے۔

پڈعیدن

پڈعیدن میں تیز ہواؤں کے ساتھ بارش کا سلسلہ جاری ہے۔ بارش کے باعث گرمی کا زور ٹوٹ گیا، تاہم واپڈا ذرائع کے مطابق 6 فیڈر ٹرپ کر گئے ہیں جس سے شہر اور نواحی دیہات بجلی سے محروم ہو گئے ہیں۔

لاڑکانہ

لاڑکانہ اور اطراف کے علاقوں میں گرج چمک کے ساتھ بارش ہوئی، جس کے نتیجے میں نشیبی علاقے زیرِ آب آ گئے اور بجلی کی فراہمی بھی معطل ہو گئی۔ تاہم موسم خوشگوار ہو گیا اور درجہ حرارت میں نمایاں کمی آئی۔

نوشہروفیروز

شہر میں ہلکی ہلکی بارش کا سلسلہ جاری ہے۔ بارش کے باعث موسم خوشگوار ہو گیا اور گرمی کی شدت میں کمی آئی ہے۔

جوہی

جوہی میں بھی تیز آندھی کے بعد بارش کا سلسلہ شروع ہو گیا، جس کے بعد شہر میں بجلی معطل ہو گئی۔

شہریوں نے موسم کی تبدیلی پر سکھ کا سانس لیا، تاہم بجلی بند ہونے سے معمولات متاثر ہوئے ہیں۔

محکمہ موسمیات کے مطابق بارشوں کا یہ سلسلہ آئندہ 24 گھنٹوں تک جاری رہنے کا امکان ہے، جس کے باعث شہریوں کو احتیاطی تدابیر اختیار کرنے کی ہدایت کی گئی ہے۔