جاپان کے شہر اوساکا میں کل سے شروع ہونے والے جی ٹوئنٹی اجلا س میں شرکت کیلئے عالمی رہنماوں کی آمد کا سلسلہ جاری ہے۔

غیرملکی خبر ایجنسی  کے مطابق امریکی صدر ڈونلڈ ٹرمپ نے اجلاس  کے سلسلے میں اوساکا پہنچے سے قبل جاپان کو تنقید کا نشانہ بناتے  ہوئے کہا کہ امریکا جاپان کے ساتھ دفاعی اتحادی ہے  اور اگر جاپان پر کوئی حملہ کرتا ہے تو امریکا اس کے ساتھ جنگ لڑے گا لیکن اگر امریکا پر حملہ ہوتا ہے تو جاپان سونی ٹی وی پر بیٹھ کے مناظر دیکھے گا۔

غیر ملکی خبر ایجنسی کی رپورٹ کے مطابق وہائٹ ہاوس حکام کا کہناہے کہ امریکی صدر جاپان دورے کے دوران روسی صدر پیوٹن اور چینی ہم منصب شی جن پنگ سے بھی ملیں گے۔

اس کے علاوہ ڈونلڈ ٹرمپ جرمن چانسلر میرکل، ترک صدر اردوان  اور بھارتی وزیر اعظم مودی سے ملنے کا ارادہ بھی رکھتے ہیں۔

جاپانی میڈیا کا کہنا ہے کہ عالمی رہنماوں کو اوساکا میں قیام کےدوران خاطر خواہ سیکیورٹی فراہم کی جائے گی اور اس سلسے میں ایئرپورٹس سمیت متعدد مقامات پر 32 ہزار پولیس اہلکاروں کو تعینات کیا گیا ہے۔ سیکیورٹی خدشات پر  کئی شاہراہیں بھی رکاوٹیں لگا کر بند کردی گٗی ہیں۔

جاپان میں دو روز کے لیے 700 اسکول بند رہیں گے جب کہ عوام کو ٹرین اور سب وے کے استعمال کی ہدایت کی گئی ہے۔