شمالی کوریا نے اپنی دفاعی صلاحیت کو مزید مضبوط کرنے کے لیے مزید دو میزائلوں کا کامیاب  تجربہ کیا ہے ۔

غیرملکی خبررساں ادارے کے مطابق  شمالی کوریا کے مقامی وقت کے مطابق میزائلوں  کا تجربہ صبح پانچ بجکر 34 منٹ اورپانچ بجکر 57منٹ پر کیا گیا۔

شمالی کوریا کے حکام نے میزائلوں  کا تجربہ کرنے کی تصدیق کی ہے ۔ دونوں میزائل شمالی کوریائی ملٹری دفاعی سسٹم میں شامل کیے جائیں گے ۔

 غیر ملکی میڈیا کا کہنا ہے  کہ     شمالی کوریا کی جانب سے میزائل تجربات کرنے کا مقصد امریکا کو اپنی طاقت کا احساس دلانا ہے، جبکہ شمالی کوریا کی جانب سے  مستقبل میں مزید میزائلوں کےتجربات کا عندیہ دیا گیا ہے۔

شمالی کوریا کا میزائل 270 میل کا فاصلہ طے کرنے کے بعد جاپان کی سمندری حدود میں جاگرا جو ’’مشرقی سمندر‘‘ کے نام سے جانا جاتا ہے۔ جاپان نے پیانگ یانگ کی تازہ کارروائی کو جارحانہ اور افسوسناک قرار دیا ہے۔

یاد رہے کہ اس سے قبل  شمالی کوریا کے سربراہ کم جونگ ان کی امریکی صدر ڈونلڈ ٹرمپ سے دوسری ملاقات کے فوری بعد کوریائی حکومت نے ایک شارٹ رینج میزائل کا تجربہ کیا تھا جو اس بات کا ثبوت تھا کہ مذاکرات کی ناکامی کے باوجود شمالی کوریا اپنا دفاعی نظام کمزور نہیں کرسکتا۔

دوسری جانب شمالی کوریا کی جانب سے کئے  گئے  میزائل کے تجربے  پر امریکا کی جانب سے  سے کوئی ردعمل  سامنے نہیں  آیا ہے ۔