مقبوضہ کشمیر میں جاری بھارتی مظالم پرپیرس میں بھرپوراحتجاج کیا گیا۔

تفصیلات کےمطابق بھارتی وزیراعظم نریندرمودی کی پیرس پہنچنے پرشہری پھٹ پڑے۔

بھارتی وزیراعظم نریندرمودی کی پیرس آمد کے موقع پرپاکستانی،کشمیری اورسکھ کمیونٹی نے یونیسکو آفس کے سامنےاحتجاجی مظاہرہ کیا۔

مظاہرے میں شریک پنجرے میں بند نوجوانوں نے اپنےآپ کو زنجیروں میں جکڑ کر نہتے کشمیریوں کے ساتھ اظہار یکجہتی کیا۔

مظاہرین نے احتجاج میں مودی کے خلاف نعرے بازی کی اور وادی میں جاری انسانی حقوق کی خلاف ورزیاں بند کرنے کا مطالبہ کیا۔

مظاہرین کا کہنا تھا کہ بھارت مقبوضہ کشمیرمیں نہتے شہریوں پرظلم کے پہاڑ توڑرہا ہے۔

بھارتی وزیراعظم سے ملاقات میں فرانسیسی صدرایمانویل میکرون نے بھی زوردیا ہےکہ کشمیرمیں انسانی حقوق کی فراہمی کو یقینی بنائے اور مسئلہ کشمیر کے حل کے لیے پاکستان سے مشاورت کرے۔

صدرایمانویل نے مسئلہ کشمیر کو دو طرفہ معاملہ قراردیتےہوئے بھارتی وزیراعظم نریندر مودی کوکہا کہ کہ وادی میں کشمیریوں کوآزادی اظہاررائے کے احترام کو یقینی بنانے اورمسئلہ کشمیر کے حل کے لیے پاکستان سے مشاورت کرے۔

صدر ایمانویل میکرون نے بھارتی وزیراعظم نریندر مودی پر واضح کیا کہ وہ مسئلہ کشمیر کے حل میں پاکستان کے کردار کو اہم سمجھتے ہیں اور اس حوالے سے پاکستانی وزیراعظم عمران خان سے بھی چند روز میں بات کریں گے۔

واضح رہے کہ فرانس اور بھارت’اسٹریٹیجک پارٹنر‘ بھی ہیں اور شاید اسی وجہ سے فرانس نے ابھی تک کشمیر کے حوالے سے کھل کر بیان جاری نہیں کیا تھا تاہم جی-7 کے اجلاس میں شرکت سے قبل مودی کی فرانس آمد پرصدرایمانویل میکرون نے بند زبان کھول دی۔