امریکا میں  24  گھنٹوں  کے دوران فائرنگ کے دو بڑے واقعات پیش آئے ہیں، جن میں 30 افراد ہلاک اور متعدد زخمی ہو گئے۔

فائرنگ کا پہلا واقعہ امریکی ریاست ٹیکساس کے شہر ایل پاسو کے سیلو وسٹا شاپنگ مال میں پیش آیا۔ جس میں 20 افراد ہلاک جبکہ 40 زخمی ہوگئے پولیس نے فائرنگ میں ملوث ایک سفید فام لڑکے پیٹرک کو گرفتار کیا ہے۔

دریں اثنا امریکی صدر ڈونلڈ ٹرمپ نے ٹویٹر پر اپنے پیغام میں کہا کہ ایل پاسو شاپنگ سینٹر میں فائرنگ کے حوالے سے بری اطلاعات ہیں، کئی لوگ ہلاک ہوئے ہیں۔ انہوں نے کہا کہ مقامی انتظامیہ اور قانون نافذ کرنے والوں کے ساتھ ہیں۔

دوسری جانب ٹیکساس کےگورنر گریگ ایبٹ نے واقعہ کو بے رحم تشدد قرار دیتے ہوئے سخت الفاظ میں مذمت کی ہے۔

جبکہ فائرنگ کا دوسرا واقعہ ریاست اوہائیو کے بار میں پیش آیا جس میں 9 افراد ہلاک جبکہ کئی زخمی ہوگئے۔

تفصیلات کے مطابق اوہائیو کے شہر ڈیٹن میں یہ تازہ واقعہ مقامی وقت کے مطابق بروز اتوار رات ایک بجے پیش آیا جہاں حملہ آور نے ڈیٹن شہر کے اوریگون ڈسٹرکٹ میں فائرنگ کردی جسکے نتیجے میں حملہ آور سمیت 10 افراد ہلاک اور 16زخمی ہوئے ہیں۔

ڈیٹن شہر کے نائب پولیس چیف میٹ کارپرکا کہنا ہے کہ حملہ آور نے فائرنگ کی جس کے نتیجے میں ہلاکتیں ہوئیں، موقع پر موجود پولیس اہلکار نے اسے روکنے کی کوشش کی اور جوابی فائرنگ میں حملہ آور بھی مارا گیا۔

پولیس حکام کا کہنا ہے کہ حملہ آور کی شناخت اور فائرنگ کی وجوہات جاننے کے لیے تحقیقات کا آغاز کر دیا گیا ہے۔