کشمیر میں امن و سکون کا بھارتی دعویٰ بے نقاب ہورہا ہے ، غیر ملکی میڈیا  کی جانب سے بھی کشمیریوں پر ہونے والے ظلم و جبر کی حقیقت کو سامنے لانا شروع کردیا گیا ہے جبکہ بی بی سی ،اے پی اور  ترک میڈیا نے ایک ساتھ ہی  ایسے انکشافات کیے ہیں کہ بھارتی سرکار کا بنایا ہوا جھوٹے دعوؤں کا محل  زمین بوس ہوتا دکھائی دیتا ہے۔

تفصیلات کے مطابق امریکی نیوز ایجنسی اے پی نے لکھا ہے کہ مقبوضہ وادی میں حالات نارمل ہونے کے بھارتی دعووں کا کوئی وجود نہیں ہے جبکہ کشمیریوں کی خوشی سے بھرپور تصویریں اور مقامی گانوں کی ویڈیوز جعلی  ہیں۔

دوسری جانب ترک نیوز چینل ٹی آر ٹی نے  لکھا  ہےکہ مودی نے مقبوضہ کشمیر میں ایسے بندے کو  گورنر لگایا جو انکے اشاروں پر چلتا ہے  جبکہ بھارتی
گورنر نے کہا تھا کہ وادی میں کوئی احتجاج اور زخمی  نہیں ہوا  لیکن  اب تک وادی میں  پانچ سو مظاہرے اور 100 شہری زخمی ہوچکے ہیں۔

واضح رہے کہ اس سے قبل بھارتی ریاست چھتیس گڑھ کے نکسل علیحدگی پسندوں نے مقبوضہ کشمیر میں بھارتی حکومت کے اقدام کو مسترد کرتے ہوئے کشمیریوں کی حمایت کا اعلان کردیا۔

علیحدگی پسندوں کا کہنا ہے کہ آرٹیکل 370 بھارتیہ جنتا پارٹی (بی جے پی) اور انتہا پسند تنظیم آر ایس ایس نے مل کر ختم کیا ہے۔

بھارتی میڈیا کے مطابق علیحدگی پسندوں نے انتہا پسند تنظیم آر ایس ایس سے تعلق رکھنے والی اہم ترین شخصیت اور سابق سرپنچ دادو سنگھ کو بھی قتل کردیا۔