چاغی کے علاقے تفتان میں پاک ایران سول و عسکری اور کسٹمز حکام کا ایک روزہ مشترکہ اجلاس منعقد ہوا ہے۔

تفصیلات کے مطابق اجلاس میں پاکستانی وفد کی نمائندگی اسسٹنٹ کمشنر دالبندین حبیب ناصر نے کی جبکہ مشترکہ اجلاس میں ایرانی وفد کی قیادت میرجاوا کے مرزبان درجہ اول حیدر مریدی نے کی ہے۔

اجلاس میں مقدس ایام کے دوران ایران جانے والے زائرین کو خصوصی سہولیات فراہم کرنے کا فیصلہ کیا گیا ہے جبکہ دوسری جانب زائرین کو سہولیات فراہم کرنے کے لیے سرحد کے دونوں جانب 20 خصوصی کاونٹر کے قیام کا بھی فیصلہ کیا گیا ہے۔

چاغی میں منعقد اجلاس میں محرم اور چہلم کے موقع پر زائرین کے لیے سرحدی گزرگاہ چوبیس گھنٹے کھلے رکھنے کا فیصلہ ہوا ہے جبکہ زائرین کی آمد و رفت آسان بنانے کے لیے الگ راستے اور فوکل پرسن مقرر کرنے اور ٹریفک کی روانی برقرار رکھنے کے لیے بھی زائرین کے قافلوں کی منظم نقل و حرکت کا بھی فیصلہ کیا گیا ہے۔

ایک روزہ مشترکہ اجلاس میں ایرانی حکام کا زائرین کے بسوں کی حالت معیاری اور مطلوبہ ایندھن کی فراہمی یقینی بنانے کا مطالبہ کردیا گیا ہے جبکہ دوسری جانب دستاویزات گم ہونے پر زائرین کے لیے خصوصی ہنگامی دستاویزات کا حصول آسان بنانے کا فیصلہ کیا گیا ہے۔