عراق کے شہرکربلا میں جمعے کو مسافر بس میں دھماکے نتیجے میں خواتین اور بچوں سمیت 12افراد جاں بحق جبکہ متعدد زخمی ہوگئے۔

غیر ملکی خبررساں ادارے کے مطابق مسافر بس عراق کے شہر کربلا اور الحلہ کے درمیان واقع عراقی فوجی چوکی کے پاس سے گزر رہی تھی کہ اس میں دھماکا ہوگیا۔ جس کے نتیجے میں 12افراد جاں بحق جبکہ درجنوں زخمی ہوگئے۔

دھماکے میں زخمی ہونے والے تمام افراد کو اسپتال منتقل کردیا گیا ہے جہاں انہیں طبی امداد دی جارہی ہے۔

عراقی حکام کے مطابق فوری طور پر یہ واضح نہیں ہو سکا ہے کہ اس دھماکے کے پیچھے کوئی خودکش حملہ آور تھا یا نہیں؟ کسی تنظیم نے اب تک اس کی ذمہ داری قبول نہیں کی۔

2017 میں عراق کے اندر شدت پسند اسلامک اسٹیٹ گروپ داعش کی شکست کے بعد یہ سب سے بڑے حملوں میں سے ایک تھا۔

دوسری جانب عراق نے 2017 میں ‘داعش’ کو کچلنے کا اعلان کیا تھا مگر شدت پسند گروپ کے سلیپرسیل اب بھی حملوں کا سلسلہ جاری رکھے ہوئے ہیں اور ملک میں سیکیورٹی فورسز کو نشانہ بناتے رہتے ہیں۔

 جبکہ گزشتہ دنوں عاشورہ کے موقع پر کربلا ہی میں ایک ناخوشگوار واقعہ پیش آیا تھا جس میں زائرین کی بڑی تعداد کے باعث بھگدڑ مچ جانے سے اکتیس زائرین جاں بحق جبکہ100  سےزائد زخمی ہوئے تھے۔

واضح رہے کہ رواں سال مئی میں عراق کے دارالحکومت بغداد کی ایک مارکیٹ میں خودکش بم دھماکہ ہوا تھا، جس میں 11افراد جاں بحق اور 15 زخمی ہوگئےتھے۔ جبکہ حملےکی زمہ داری داعش نے قبول کرتے ہوئے 50افراد کو ہلاک کرنے کا دعوی کیا تھا۔