بھارتی ریاست اترپردیش کے  سرکاری کالج میں برقعہ پہننے والی طالبات کو کالج میں داخل ہونے سے روک دیا گیا۔

بھارتی  خبر رساں  ادارے کی رپورٹ کے مطابق بھارتی ریاست اترپردیش کے شہر فیروز آباد کے ’ایس آر کے‘ کالج میں طالبات کو برقعہ پہن کر کالج کے اندر جانے سے روک دیا گیا۔

اس حوالے سے ایس آر کے کالج کے پرنسپل ’پربھاسکررائے‘ کا کہنا ہے کہ کالج کے پرانے ضابطے پر عمل درآمد کیا جارہا ہے جس کے مطابق طالبات یونیفارم میں ہوں اور ان کے پاس آئی ڈی کارڈز موجود ہوں جبکہ برقعہ یونیفارم کا حصہ نہیں ہے۔ اس لیے طالبات کو برقعہ پہن کر کالج میں آنے کی اجازت نہیں ہوگی۔

برقعے کے حوالے سے اپنے بیان میں  کالج پرنسپل کا کہنا تھاکہ لڑکیوں کے برقعہ پہن کر کالج آنے پر پابندی عائد نہیں کی گئی ہے بلکہ اُنہیں رنگ برنگے برقعوں کے پہننے سے روکا گیا ہے۔

انہوں نے کہا کہ کالج کے اندر برقعے کا رنگ صرف ’گرے‘ ہو، اگر طالبات کسی اور رنگ کے برقعے میں کالج آتی ہیں تو اُن کو داخلے کی اجازت نہیں ہوگی۔

کالج پرنسپل  پربھاسکر رائے   کا مزید  کہنا تھا کہ کالج  انتظامیہ   کی جانب سے  طالبات کے لیے ایک اور سہولت بھی رکھی  گئی ہے    اگر وہ کسی اور رنگ کا برقعہ پہن کر کالج آنا چاہتی ہیں تو آسکتی ہیں لیکن انہیں وہ برقعہ پہن کر کلاس روم میں جانے کی اجازت نہیں ہوگی، بلکہ کالج میں داخلے ہوتے ہی انہیں چینجنگ روم میں برقعہ اُتار کر کلاس میں آنا ہوگا۔

فیروز آباد کا ’ایس آر کے‘ کالج بھارت کے بہترین کالجوں میں شمار ہوتا ہے، جو کہ تقریباً 100 سال پرانا ہے۔ اس کالج میں دو ہزار کے قریب طلباء زیر تعلیم ہیں جن میں سے 20 فیصد   مسلمان ہیں ۔

 واضح رہے  کہ  ایس آر کے کالج میں برقعے پر پابندی چند روز قبل لگائی گئی تھی جس کے بعد کالج کے خلاف ایک بہت بڑا تنازع کھڑا ہوگیا تھا۔ اس کے بعد کالج انتظامیہ کا اپنے موقف میں کہنا تھا کہ انہوں نے کوئی نیا آڈر جاری نہیں کیا بلکہ یہ اُن کا 7 سال پرانہ ’ڈریس کوڈ‘ ہے۔