برطانیہ کے میوزیم سے چور اٹھارہ قیراط خالص سونے سے بنا ٹوائلٹ لے اڑے، اطالوی آرٹسٹ کے ہاتھوں سے بنے سونے کے اس انوکھےکموڈ کی قیمت پچاس لاکھ ڈالر ہے۔

غیرملکی خبررساں ادارے کے مطابق برطانیہ کے بلین ہیم محل میں آرٹ کی نمائش کے دوران رکھا گیا 18  قیراط  سونے کا ٹوائلٹ چوروں کا گینگ لے اڑا۔

پولیس کا کہنا ہے کہ سونے کا ٹوائلٹ چرانے کے شبے میں آکسفورڈ شائر سے 66 سالہ ایک شخص کو گرفتار کیا گیا ہے۔

 پولیس حکام کے مطابق ملزمان رات کو تقریباً 4:50 منٹ کے قریب محل میں داخل ہوئے اور ٹوائلٹ چرا کر فرار ہوگئے۔

انسپکٹر جیس ملنے کا کہنا ہے کہ آرٹ کا ٹکڑا جو چوری ہوچکا ہے وہ سونے سے بنا ہوا ایک قیمتی ٹوائلٹ تھا جو محل میں نمائش کے لیےلایا گیا تھا۔

انسپکٹر جیس ملنے کے مطابق چوری کی واردات میں ملوث گروہ نے واردات کے لیے دو گاڑیوں کا استعمال کیا۔

انہوں نے کہا کہ چوری ہونے والا سونے کا ٹوائلٹ تاحال برآمد نہیں ہوا ہے لیکن ملزمان کی گرفتاری کے لیے تحقیقات کا آغاز کردیا گیا ہے۔

 واضح  رہے کہ بین ہیم پیلس رواں  ہفتے جمعرات  کو نمائش منعقد کی گئی تھی جس میں سونے سے بنے ٹوائلٹ  کو بھی نمائش کے لئے رکھا گیا تھا جبکہ پیلس کو چوری کی واردات کے بعد ہفتے کی صبح بند کردیا گیا ہے۔