مالی کے دارالحکومت بماکو میں ٹریفک حادثے کے دوران فیول ٹینکر پھٹنےسے6 افراد ہلاک اور 46  سے زائد زخمی ہوگئے۔

 غیر ملکی خبر رساں ادارے کے مطابق  منگل کے روز مالی کے دارالحکومت بماکو کے وسط میں  تیز رفتار آئل ٹینکر موٹر سائیکل  کو کراس کرتے ہوئے  بے قابو ہوکر الٹ گیا۔

حادثے کے بعد  ٹینکر میں  موجود  آئل کے رساو کے بعد آگ بھڑک اٹھی  ، جس نے دیکھتے ہی دیکھتے آس پاس  سے گزرتی گاڑیوں  اور راہ گیروں  کو اپنی لپیٹ میں  لے لیا۔    اس  المناک حادثے میں 6 افراد ہلاک اور 46 زخمی ہوگئے ہیں ۔

 ضلع بماکو کے شہری تحفظ کے ڈائریکٹرجنرل لیفٹیننٹ جنرل دیارا کا کہنا تھا کہ حادثے میں متعدد افراد جھلس چکے ہیں۔

اس المناک حادثے   میں جانی نقصان کے ساتھ ساتھ مالی نقصان بھی ہوا ہے۔ حادثے میں 30 سے ​​زائد موٹرسائیکلیں ، ایک پک اپ اور سامان سے بھری  گاڑی  بھی جل کے خاکستر ہوچکی ہے ۔

جنرل دیارا کا مزید کہنا تھا کہ  اس بارے میں فوری طور پر کچھ کہا نہیں  جاسکتا کہ اس حادثے  کا اسلام پسند گروہوں سے کوئی تعلق ہے جو مغربی افریقی ملک کے شمال اور شمال میں  پرتشدد حملے کرتے رہتے ہیں۔

واضح رہے کہ اس سے قبل رواں سال مئی میں بماکو میں ہی ٹریفک حادثہ پیش آیا تھا جس کے نتیجے میں 20 افراد جاں بحق  جبکہ   16 افراد زخمی ہوگئے تھے ۔