ایران کی وزارت خارجہ نے اعلان کیا ہے کہ عراقی حکومت اور قوم کے تعاون سے دشمنوں کو اپنی ناپاک حرکتیں جاری رکھنے اور اغیار کو اس ملک کے موجودہ حالات سے ناجائز فائدہ نہیں اٹھانے دیا جائے گا۔

 تفصیلات کے مطابق ایران کی وزارت خارجہ نے جمعرات کو ایک بیان جاری کر کے عراق کے کچھ شہروں کے  اندر محلّوں  کی سطح بدامنی کے اکّا دکّا واقعات پر افسوس کا اظہار کرتے ہوئے اس یقین کا اظہار کیا کہ عراقی قوم اورحکومت تمام گروہوں ، پارٹیوں اور شخصیات خاص طور سے مراجع عظام اور دیگر مذہبی اور سیاسی رہنماؤں کے تعاون سے موجودہ بدامنی کے بعض واقعات پر قابو پالے گی اور ایسے بعض اقدامات  کو جو عراقی قوم کے نقصان میں ہیں اور اغیار کے ناجائز فائدہ اٹھانے کا باعث ہیں، جاری نہیں رکھنے دے گی ۔

بغداد سمیت عراق کے بعض شہروں میں پیر سے بےروزگاری اور اقتصادی مسائل کے بہانے مظاہرے ہو رہے ہیں ۔ بعض ذرائع کے مطابق بغداد اور صوبہ ذیقار میں مظاہرین اور پولیس کے درمیان ہونے والی جھڑپوں میں بدھ تک متعدد افراد جاں بحق اور زخمی ہوئے تھے۔

واضح رہے کہ  ایران نے عراق میں حالیہ  بد امنی کے بعد اپنی دو  سرحدی  گذرگاہیں  عارضی  طور پر بند کر دیں  ہیں۔   ان میں ایک  گذر گاہ  کو ایرانی  زائرین  عراق میں آمدورفت  کے لئے استعمال کرتی ہیں ۔

Advertisement

ایران کی نیم سرکاری خبررساں ایجنسی مہر نے ایران کے سرحدی محافظوں کے کمانڈر جنرل قاسم رضاعی کے حوالے سے اطلاع دی ہے کہ خسروی اور چا زابہ کی گذرگاہ کو بدھ کی شب سے بند کردیا گیا ہے۔

عراق میں گذشتہ تین روز سے حکومت مخالف احتجاجی مظاہرے جاری ہیں اور ان میں اٹھارہ افراد ہلاک اور سیکڑوں زخمی ہوگئے ہیں۔