افغانستان کے شمالی صوبے قندوز میں سڑک کنارے نصب بم پھٹنے سے 15 افراد جاں بحق ہوگئے۔

غیر ملکی خبر رساں ادارے کے مطابق گذشتہ شام افغانستان کے شمال مشرقی صوبے قندوز میں سڑک کے کنارے نصب بم پھٹنے سے 8 بچوں اور 6 خواتین سمیت 15افراد جاں بحق ہوگئے ۔

قندوز کے ضلع امام صاحب کے انتظامی سربراہ محب اللہ سیدی کا کہنا تھا کہ یہ واقعہ ضلع کی مرکزی شاہراہ میں پیش آیا۔

ان کا کہنا تھا کہ  جاں بحق افراد شادی کی تقریب میں شرکت کے بعد واپس جارہے تھے اور بدقسمتی سے ان کی گاڑی سڑک کنارے نصب بم کے دھماکے کا نشانہ بن گئی ۔

افغان وزارتِ داخلہ نے اس دھماکے کا الزام طالبان پر لگاتے ہوئے کہا ہے کہ جہاں یہ واقعہ پیش آیا ہے وہاں پر طالبان کا کنٹرول ہے اور اس کے ذمہ دار بھی وہی ہیں۔

 تاہم طالبان کی جانب سے اب تک اس دھماکے کی ذمہ داری قبول نہیں کی گئی ہے۔

افغان حکام کے مطابق مرنے والوں  میں چھ خواتین، چھ لڑکیوں اور دو شیرخوار بچوں کے علاوہ گاڑی کا مرد ڈرائیور شامل ہے۔

واضح رہے کہ اس وقت بھی نصف سے زیادہ افغانستان پر طالبان کا قبضہ ہے جبکہ مختلف علاقوں میں افغان اہلکاروں پر حملے روزانہ کا معمول بن چکے ہیں۔

 ان حملوں میں افغان اہلکاروں کے علاوہ بڑے پیمانے پر عام شہریوں کا جانی نقصان بھی ہوتا ہے۔

اقوام متحدہ کی جانب سے جاری ایک بیان کے مطابق افغانستان میں رواں برس 2018 کے مقابلے میں دہشت گردی کے واقعات میں شہریوں کی بڑی تعداد جاں بحق ہوگئی ہے جبکہ گذشتہ برس بھی ریکارڈ ہلاکتیں ہوئیں تھیں۔

بیان میں کہا گیا ہے کہ دہشت گردی کے نتیجے میں رواں برس کے پہلے 6 ماہ میں 3 ہزار 812 شہری جاں بحق ہوئے جن میں 144 خواتین اور 324 بچے شامل ہیں جبکہ ایک ہزار سے زائد افراد زخمی ہوئے۔