افغانستان میں پاکستان ایئر لائن ( پی آئی اے ) کے طیارے کو کابل ایئرپورٹ پر بغیر کسی وجہ کے روک لیا  گیا۔

تفصیلات کے مطابق افغان حکام کی جانب سے  پی آئی اے کے مسافروں کو ہراساں کرنے کی کوشش کی  اور متعصبانہ رویہ اپناتے ہوئے اڑان کے لئے چھوٹا رن وے استعمال کرنے کی ہدایت کی۔

کابل سے اسلام آبادجانے والے قومی ایئر لائن کے طیارے پی کے 250 میں 162 افراد سوار تھے۔افغان حکام  نے مسافروں کو جہازسےاترنے بھی نہیں دیا۔

افغان حکام کا کہنا ہے کہ کابل سے اسلام آباد کی پرواز کابل ایئر پورٹ کے رن وے کی مرمت کی وجہ سے پرواز تاخیر کا شکار ہوئی۔ مرمتی رکاوٹ کے باعث مکمل رن وے کی سہولت میسر نہیں تھی۔تاہم اس دوران رن وے سے امارات اور فلائی دبئی کے بڑے طیارے معمول کےمطابق اڑان بھرتے رہے۔

ایئرٹریفک کنٹرولر کی اجازت کے بعد پرواز نے رن وے کے دوسرے حصے سے ٹیک آف کیا۔ ایئرٹریفک کنٹرولر نے 15 مسافروں کو پرواز سے اتارنے کے لئے کہا۔

  پی آئی اے  کی جانب سے موقف اختیار کیا گیا کہ  مسافروں کو غیر ملک میں چھوڑ کے نہیں جا سکتے ۔افغان انتظامیہ نے موقف مان کر اڑان کی  اجازت دے دی۔

ترجمان پی آئی اے کے مطابق جہاز مقامی وقت کے مطابق 3 بج کر 20 منٹ پہ اسلام آباد لینڈ کر چکا ہے ۔

ذرائع کے مطابق پاکستانی حکام نےمعاملہ افغان قیادت کےساتھ استنبول میں اٹھایا، افغان قیادت استنبول میں ہارٹ آف ایشیاکانفرنس کےلئےموجودہے، جس کے بعد پی آئی اے کا طیارہ تمام162مسافروں کے ہمراہ اسلام آباد روانہ ہوا۔

یاد رہے گذشتہ ماہ افغانستان میں موجود پاکستانی سفارت کاروں کو سول کپڑوں میں ملبوس نامعلوم مسلح افراد ہراساں کررہے تھے جبکہ ان کی نقل و حرکت میں بھی رکاوٹ ڈالی جا رہی تھی۔ہراساں کرنے کے واقعات گھر سے لے کر سفارت خانے اور واپسی کے راستے میں پیش آئے۔