مقبوضہ کشمیر کی صورتحال بہت خطرناک ہو چکی ہے یہ کہنا تھا  صدر آزاد کشمیر سردار مسعود احمد خان کا جب وہ کشمیر کی نمائندگی کے لئے لندن پہنچے۔

تفصیلات کے مطابق صدر آزاد کشمیر سردار مسعود احمد خان برطانیہ پہنچ گئے، لندن پہنچنے پر پاکستانی ہائی کمیشن کے عملے نے استقبال کیا۔

ایئرپورٹ پر میڈیا سے گفتگو میں سردار مسعود احمد خان کا کہنا تھا کہ مقبوضہ کشمیر کی صورتحال بہت خطرناک ہو چکی ہے، بھارتی لاک ڈاؤن کو بھی ایک سو بیس دن ہوچکے ہیں۔ ان کا مزید کہنا تھا کہ برطانیہ کے ایم پیز اوورسیز کمیونٹی نے کشمیر کاز کو بہت سپورٹ کیا ہے،عالمی برادری کشمیری عوام کواُنکا حق دلوانے میں مدد کرے۔

یاد رہے کہ مقبوضہ کشمیر میں بھارتی فوج کا کرفیو اور محاصرہ 120 روز سے جاری ہے۔

مقبوضہ کشمیر میں مسلسل117 ویں روز بھی بھارت کے سخت فوجی محاصرے اور انٹرنیٹ کی معطلی کے باعث نظام زندگی بری طرح مفلوج ہے۔

 مقبوضہ وادی میں بھاری تعداد میں بھارتی فوجیوں کی تعیناتی اور دفعہ 144کے تحت پابندیوں کے نفاذ سے کشمیریوں کو شدید مشکلات کاسامنا ہے ۔

مقبوضہ کشمیر میں غاصب بھارتی فوج کشمیریوں کی نسل کشی کر رہی ہے، کشمیری نوجوانوں کو شہید کر کے بھارتی فوج جشن مناتی ہے۔

قابض انتظامیہ کی طرف سے لوگوں کو نماز جمعہ کے بعد بھارت مخالف مظاہروں سے روکنے کے لیےسرینگر سمیت دیگر علاقوں میں سخت پابندیاں دوبارہ نافذ کی گئی ہیں۔

پانچ اگست سے سرینگر کی تاریخی جامع مسجد اور مقبوضہ علاقے کی دیگر بڑی مساجد میں کشمیری مسلمانوںکو نماز جمعہ ادا نہیں کرنے دی گئی ہے۔

لینڈ لائن ٹیلی فون اور پوسٹ پیڈ موبائل فون کنکشنوں کی جزوی بحالی کے باوجود انٹرنیٹ ، ایس ایم ایس اور پری پیڈ موبائل فون سروسز مسلسل معطل ہیں۔

وادی کشمیرمیں بھارت کے یکطرفہ اقدامات کے خلاف کشمیری عوام سول نافرمانی کی تحریک جاری رکھے ہوئے ہیں۔زیادہ تر دکانیں اورتجارتی مراکزبند ہیں جبکہ اسکولو ں اور دفاتر میں حاضری کم ہے۔