سعودی عرب میں شادی کے لیے عمر کی حد مقرر کردی ہے۔

تفصیلات کے مطابق سعودی عرب کی حکومت نے شادی کے لیے عمر 18 سال مقرر کردی ہے۔

اس سے قبل سعودی عرب میں شادی کے لیے ایسا کوئی قانون نہیں تھا لیکن کچھ ایسے کم عمری میں شادی کے واقعات سامنے آرہے تھے جس کے باعث سعودی حکومت نے شادی کے لیے عمر مقرر کر دی ہے۔

سعودی عرب میں شادی کے کئی واقعات میں لڑکیوں کی شادی 15 سال سے کم عمری میں بھی کرائی جاتی تھیں۔

اسی طرح لڑکوں کے لیے بھی شادی کی عمر کی کوئی خاص حد مقرر نہیں تھی، تاہم اب پہلی بار شادی کے لیے عمر کی حد کا تعین کردیا گیا۔

دوسری جانب چائلڈ میرج پروٹیکشن نامی بل کو سعودی شوریٰ کونسل نے پاس کیا اور اس بل پر گزشتہ کئی ماہ سے قانون سازی جاری تھی۔

یاد رہے کہ سعودی حکومت نے تمام عدالتوں کو ہدایت نامہ جاری کرتے ہوئے کہا ہے کہ شادی کی کم سے کم عمر 18 سال ہونا ضروری ہے اور شادی کے لیے 18 سال کی عمر کی شرط لڑکوں سمیت لڑکیوں کے لیے بھی ہے۔

نئے قانون میں عدالتوں اور حکام کو اس بات کا پابند بنایا گیا ہے کہ کس طرح بھی شادی کرنے والے لڑکے یا لڑکی کی عمر 15 سال سے کم نہ ہو۔

واضح رہے کہ  لڑکیوں کو یہ حق بھی دیا گیا ہے کہ وہ شادی ختم کروانے کے لیے عدالت سے رجوع کر سکتی ہیں۔