متحدہ عرب امارات میں گاڑی میں خوفناک آگ بھڑک اٹھی جس کے نتیجے میں  ڈرائیور زخمی ہوگیا ہے۔

خبررساں ادارے کے مطابق متحدہ عرب امارات کی ریاست راس الخیمہ رنگ روڈ پر گاڑی ڈرائیور کے قابو سے باہر ہوکر بجلی کے کھمبے سے ٹکرا گئی جس کے نتیجے میں گاڑی میں آگ بھڑک اٹھی۔

پولیس کے مطابق ڈرائیور تیز رفتاری کے سبب گاڑی پر قابو نہ پاسکا اور گاڑی بجلی کے کھمبے سے جاٹکرائی، فائر فائٹرز نے جائے وقوعہ پر پہنچ کر گاڑی میں لگی آگ پر قابو پایا جبکہ گاڑی مکمل طور پر جل کر خاکستر ہوگئی۔

پولیس کا کہنا  تھا  کہ حادثے کی تحقیقات کا آغاز کردیا گیا ہے جبکہ  ابتدائی رپورٹ کے مطابق آگ گاڑی کے انجن میں لگی جس نے دیکھتے ہی دیکھتے پوری گاڑی کو اپنی لپیٹ میں لے لیا

پولیس کا  یہ بھی کہنا تھا کہ حادثے میں کوئی جانی نقصان نہیں ہوا تاہم ڈرائیور زخمی ہوا جسے طبی امداد کے لیے اسپتال منتقل کردیا گیا ہے۔

پولیس کا مزید کہنا تھا کہ تمام ڈرائیور ٹریفک کے قوانین کی پاسداری کریں کیونکہ گاڑی سے ایندھن کا رساؤ اس طرح کے حادثات کی وجہ بنتا ہے۔

واضح رہے کہ چند روز قبل شارجہ کے الیسوک علاقے میں دو گاڑیوں میں خوفناک تصادم کے نتیجے میں مسجد کے پیش امام اہلیہ سمیت جاں بحق ہوگئے تھے جبکہ ان کی بیٹی کو تشویش ناک حالت میں اسپتال منتقل کردیا گیا تھا۔

خیال رہے کہ 9 نومبر کو متحدہ عرب امارات کی ریاست راس الخیمہ میں ٹریفک حادثے کے نتیجے میں 42 سالہ خاتون جاں بحق اور ان کی بہن زخمی ہوگئی تھیں جبکہ رواں سال جون میں  بھی دبئی میں خوفناک ٹریفک حادثے کے نتیجے میں 2 پاکستانی شہری سمیت 17 افراد ہلاک ہوگئے تھے، رواں سال اپریل میں شارجہ میں سوڈانی سیاحوں کی گاڑی کو حادثہ پیش آیا تھا جس کے نتیجے میں ایک شخص جاں بحق اور 3 افراد زخمی ہوگئے تھے۔