عراقی وزیر اعظم عادل عبدالمہدی نے امریکہ سے مطالبہ کیا ہے کہ وہ عراقی سرزمین سے امریکی افواج کے انخلا ءکے لیے طریقہ کار طے کرے۔

عراقی وزیراعظم کے سماجی رابطے کی ویب سائٹ فیس بک صفحے پر جاری ہونے والے بیان کے مطابق انہوں نے یہ مطالبہ امریکی سیکریٹری خارجہ مائیک پومپیو سے ٹیلیفونک بات چیت کے دوران کیا ہے۔

اس گفتگو کے دوران وزیراعظم  عادل عبدالمہدی کا کہنا تھا کہ وہ عراقی خودمختاری اور سالمیت کے خلاف ہر قسم کے اقدام کو رد کرتے ہیں۔

انہوں نے مزید کہا کہ ان اقدامات میں امریکا کی جانب سے ایرانی جنرل قاسم سلیمانی کی ہلاکت اور  ایران کی جانب سے عراق میں واقع دو امریکی فوجی اڈوں کے خلاف جوابی کارروائی شامل ہیں۔

جاری کردہ بیان کے مطابق عراقی وزیر اعظم نے مائیک پومپیو سے کہا کہ وہ ایک وفد عراق بھیجیں جو پارلیمانی قرارداد پر عمل درآمد کرنے کے لیے امریکی افواج کے عراق سے بحفاظت انخلا کے لیے ایک لائحہ عمل مرتب کرے گا۔

بھارتی سپریم کورٹ نے کشمیر پرعائد پابندیاں غیر آئینی قراردے دی

مائیک پومپیو سے کی گئی عراقی وزیر اعظم کی گفتگو سے پتہ چلتا ہے کہ وہ  تہران اور واشنگٹن کے درمیان کشیدگی میں کمی کے باوجود اپنے سابقہ ​​بیانات پر قائم ہیں کہ امریکی افواج  عراق سے نکل جائیں۔

واضح  رہے کہ 3 جنوری کو عراقی دارالحکومت بغداد میں ہونے والےڈرون حملے میں ایرانی پاسداران انقلاب کی القدس فورس کے سربراہ جنرل قاسم سلیمانی جاں بحق ہوگئے تھے۔

جس کے بعد دونوں ممالک کے درمیان سخت بیانات کا تبادلہ ہوا اور ایران کے سپریم لیڈر آیت اللہ خامنہ ای کی جانب سے شدید انتقام لینے کا پیغام دیا گیا تھا۔

ایران نے 5 جنوری کو جوابی کارروائی میں  عراق میں دواقع امریکی بیسز ’عین الاسد‘ اور ’ اربیل ‘ پر درجنوں میزائلز سے حملہ کیا جس میں 80 فوجیوں کی ہلاکت کا دعویٰ کیا گیا تھا۔

دوسری جانب امریکی صدر کا کہنا تھا کہ حملے میں کوئی جانی نقصان نہیں ہوا ، سب کچھ ٹھیک ہے۔