بھارتی ریاست امروہا میں 17 سالہ نابالغ  لڑکی کا گینگ ریپ کرنے والے 4 افراد میں سے ایک ملزم کو گرفتار کرلیا گیا جبکہ تین افراد فرار ہو گئے ۔

بھارتی خبر رساں ادارے ٹائمز آف انڈیا کی رپورٹ کے مطابق نابالغ لڑکی نے پولیس میں درج کرائی گئی شکایت میں الزام عائد کیا کہ ایک ملزم سے اس کی دوستی فیس بک پر ہوئی اور جب وہ اس سے ملنے گئی تو 4 لڑکوں نے اس کا گینگ ریپ کیا۔

لڑکی نے اپنی شکایت میں کہا کہ ‘ملزمان میں سے ایک، تہاڑپور گاؤں کی پشپیندرا چوہان سے فیس بک پر میں رابطے میں تھی، اس نے مجھ سے گجرولا میں جمعے کے روز ملاقات کرنے کا کہا، جب میں وہاں پہنچی تو وہاں اس کے 3 دوست بھی آگئے اور وہ مجھے اغوا کرکے جنگل میں لے گئے جہاں انہوں نے بندوق کے زور پر میرا گینگ ریپ کیا’۔

ہفتے کے روز لڑکی نے پولیس کو شکایت درج کرائی جس کے بعد پولیس نے ملزم پشپیندرا چوہان کے خلاف مقدمہ درج کیا اور اسے گرفتار کرلیا گیا۔

علاوہ ازیں پولیس نے دیگر ملزمان کیوندرا چوہان، جے ویر چوہان اور ایک نامعلوم ملزم کی گرفتاری کے لیے چھاپوں کا آغاز کردیا۔

میڈیا سے گفتگو کرتے ہوئے لڑکی کا کہنا تھا کہ ‘تمام ملزمان نے مجھے پولیس کے پاس جانے پر سنگین نتائج کی دھمکیاں بھی دی تھیں، ان کے چند اعلیٰ عہدیداران و بااثر شخصیات سے تعلقات بھی ہیں’۔

واضح  رہے کہ اس سے  قبل  بھارتی ریاست تامل ناڈو میں 3 افراد نے 24 سالہ لڑکی کا چاقو کے زور پر گینگ ریپ کردیا تھا۔