افغانستان میں طالبان اور سیکیورٹی فورسز کے درمیان جھڑپوں میں 7 سیکیورٹی اہلکار جبکہ 11 طالبان عسکریت پسندہلاک ہوگئے۔

غیر ملکی خبر رساں ادارے کے مطابق افغانستان کے شمالی صوبہ تخار کے ضلع درقاد میں تصادم کے نتیجے میں سات سیکیورٹی اہلکاراور 11 طالبان جنگجوہلاک ہوگئے ہیں۔

صوبہ تخار کے  پولیس ترجمان نے تصادم کے نتیجے میں سات سیکیورٹی اہلکاروں سمیت اٹھارہ عسکریت پسندوں کے ہلاک ہونے کی تصدیق کردی ہے۔

ایک مقامی عہدیدار کے مطابق  طالبان باغیوں کے ایک گروپ نے صبح سویرے ضلع درقد کے قرہ ٹیپا کے علاقے میں سیکیورٹی  فورسز چوکیوں پر حملہ کیا۔

یہ حملہ کئی گھنٹوں تک جاری رہا جس میں 7 سیکیورٹی اور فوجی اہلکاروں اور 11 طالبان عسکریت پسندوں سمیت کل 18  لوگ مارے گئے۔

دوسری جانب طالبان عسکریت پسند وں نے اپنے ساتھیوں کی ہلاکت کی تردید  کرتے ہوئےاس رپورٹ پر کوئی تبصرہ کرنے سے گریز کیا ہے۔

انہوں نے مزید بتایا کہ فائرنگ کے تبادلے میں پانچ  طالبان عسکریت پسندوں سمیت مزید سات جنگجو زخمی ہوگئے۔

افغانستان میں دس سالوں میں ایک لاکھ شہری ہلاک و زخمی ہوئے، اقوام متحدہ

واضح رہے کہ امریکا اور طالبان کے درمیان تعطل کے شکار امن مذاکرات کی بحالی کے باوجود افغانستان میں سیکیورٹی فورسز پر حملوں میں کمی نہیں آئی ہے جبکہ اسی دوران امریکی بیس پر حملے میں ایک اہلکار بھی ہلاک ہوا تھا۔

یاد رہے کہ  گزشتہ ماہ 14 تاریخ افغانستان کے صوبے غزنی میں طالبان کے  اندرونی حملے میں 23 فوجی  اہلکار ہلاک ہوگئے تھے۔

صوبائی کونسل کے صدر ناصر احمد فقیری کا کہنا  تھا کہ سات مقامی سیکیورٹی اہلکاروں نے قرباغ ضلع میں ایک فوجی اڈے پر اپنے ساتھیوں پر اس وقت فائرنگ کردی جب  وہ سو رہے تھے،جس سے وہ موقع پر ہی ہلاک ہوگئے۔

انہوں نے مزید کہا بتایا تھا کہ حملہ کرنے والے ساتوں اہلکار فائرنگ کرکے اسلحے سمیت فرار ہوگئے۔ اہلکاروں کا تعلق واضح طور پر طالبا ن سے تھا۔