ملائیشین وزیر اعظم مہاتیر محمد کا کہنا ہے وقت آگیا ہے کہ  اب مسلمان ممالک کو  متحد ہوجانا چاہیے۔

غیر ملکی خبر رساں ادارے کے مطابق ملائیشین وزیراعظم مہاتیر محمد نے ایرانی جنرل قاسم سلیمانی کی امریکی ڈرون حملے  میں ہلاکت کی شدید الفاظ میں مذمت کی ہے۔

انہوں نے کہا کہ ہم محفوظ نہیں ہیں ،اپنے تحفظ کے لیے مسلمانوں کو اب متحد ہوجانا چاہئے ۔

مہاتیر محمد نے کہا کہ آزادی رائے کا اظہار کرنا سب کا حق ہے ،آزادی اظہار کے بدلے ڈرون بھیجناکسی طور پر درست نہیں ہے۔

واضح رہے کہ امریکاکی جانب سے عراق میں ایرانی جنرل پر حملے کے بعد دنیا بھر سے ردعمل سامنے  آیا ہے۔

عراق کا  سرکاری موقف ہے کہ امریکی کارروائی اس کی سالمیت کی صریح خلاف ورزی اور ملک کے وقار پر کھلا حملہ ہے۔

دوسری جانب عراقی شیعہ رہنما مقتدیٰ الصدر نے کہا ہے کہ  قاسم سلیمانی کو نشانہ بنانا جہاد کو نشانہ بنانے کے مترادف ہے لیکن یہ ہمارے عزم کو کمزور نہیں کرے گا۔

پاکستان کسی علاقائی تنازعہ کا حصہ نہیں بنے گا، وزیرخارجہ

انہوں نے اپنے پیروکاروں کو عراق کی حفاظت کرنے کے لیے تیار رہنے کی ہدایت بھی کی۔

لبنانی گروہ حزب اللہ کے سربراہ حسن نصراللہ نے ایک بیان میں کہا ہے کہ جنرل سلیمانی کے قاتلوں کو قرار واقعی  سزا دلوانا دنیا بھر کے لوگوں کا فرض ہے۔

شام کی جانب سے ردِ عمل میں اس حملے کو بزدلانہ کارروائی  قرار دیا گیا ۔

امریکی حریف چین کی وزارتِ خارجہ کی جانب سے سامنے آنے والے ردِ عمل میں تمام قوّتوں، خاص کر امریکہ کو، تحمل کا مظاہرہ کرنے کا کہا  گیا ۔

چینی وزارتِ خارجہ کے ترجمان نے کہاکہ بین الاقوامی تعلقات میں جارحیت کی مسلسل مخالفت کی ہے۔

روس کے دفترِ خارجہ نے بھی  جنرل قاسم سلیمانی کی ہلاکت پر ردِ عمل دیتے ہوئے کہا کہ وہ  امریکی حملے کے باعث سلیمانی کی ہلاکت کو ایک غیر محتاط قدم کے طور پر دیکھتے ہیں جس سے پورے خطے میں تناؤ کی کیفیت میں اضافہ ہو سکتا ہے۔

جنرل سلیمانی نے ایران سے وفاداری نبھاتے ہوئے قومی مفادات کا دفاع کیا۔ ہم اس موقع پر ایران کے عوام سے بھرپور تعزیت کا اظہار کرتے ہیں۔

سعوسی عرب نے دونوں ممالک کو پرسکون رہتے ہوئے کشیدگی میں کمی لانے پر زور دیا۔