ایران نے امریکاکی جانب سے پاسدارانِ انقلاب کی قدس فورس کے نئے سربراہ جنرل اسماعیل قانی  کے قتل کی دھمکی کو’ریاستی دہشتگردی‘قرار دیا ہے۔

ایران کے سرکاری نشریاتی ادارے کے مطابق وزارتِ خارجہ کے ترجمان عباس موسوی نے کہا کہ امریکا کی جانب سے جنرل اسماعیل قانی کو قتل کی دھمکی دینا  باضابطہ طور پر اور کھلے عام امریکاکی ریاستی اور ٹارگٹڈ دہشتگردی کی عکاسی کرتے ہیں۔

عباس موسوی نے اسرائیلی حکومت کی جانب اشارہ کرتے ہوئے کہا کہ  صیہونی حکومت کے بعد امریکاوہ دوسری حکومت ہے جس نے باضابطہ طور پر اعلان کیا کہ اس نے اپنی حکومت اور مسلح افواج کی سہولیات کو دہشتگردانہ اقدامات کے لیے استعمال کیا اور مستقبل میں بھی کرتا رہے گا۔

ایرانی وزارت خارجہ کے ترجمان نے عالمی برادری پر زور دیا کہ وہ امریکا کی  اس ریاستی دہشتگردی  کی مذمت کرے کیونکہ  جلد یا بدیر وہ بھی اس سے متاثر ہوں گے۔

دوسری جانب روس نے بھی  امریکا کی جانب سے جنرل اسماعیل کو قتل دھمکی دیے جانےکو ناقابل قبول قرار دیا ہے۔

ماسکو میں ایک نیوز بریفنگ کے دوران روسی وزارت خارجہ کی ترجمان ماریا زاخارووا نے  کہا کہ اس طرح کے ریمارکس حقوق اور قانون سے بالاتر ہیں اور عالمی ریاستوں کے نمائندے ان کو بولنے کے حقدار نہیں ہیں۔

امریکہ کی قاسم سلیمانی کے جانشین اسماعیل قآنی کو قتل کی دھمکی

واضح رہے کہ ایران کی جانب سے یہ بیان امریکہ کے خصوصی ایلچی برائن ہوک کی اس ’تنبیہ‘ کے بعد سامنے آیا ہے کہ اگر ایرانی پاسداران انقلاب کی قدس فورس کے نئے سربراہ اسماعیل قانی کی جانب سے امریکیوں کو نشانہ بنایا گیا تو ان کا انجام  بھی ان کے پیشرو جیسا ہوگا۔

ایک انٹرویو میں انہوں نے کہا تھا کہ امریکی صدر ڈونلڈ ٹرمپ یہ پہلے ہی واضح کر چکے ہیں کہ اگر کسی امریکی شخص یا امریکی مفاد پر حملہ کیا گیا تو اس کا بھرپور جواب دیا جائے گا۔

یاد رہے کہ 3 جنوری کو عراقی دارالحکومت بغداد میں امریکی ڈرون حملے میں ایرانی پاسداران انقلاب کی قدس فورس کے سربراہ جنرل قاسم سلیمانی کی ہلاکت کے بعد مشرق وسطیٰ کی صورت حال انتہائی کشیدہ ہو گئی تھی۔

جس کے جواب میں ایران نے 7 اور 8 جنوری کی درمیانی شب میں بھرپور جوابی حملہ کرتے ہوئے بغداد میں واقع امریکی ایئر بیس پر درجنوں بیلسٹک میزائل داغ دیے تھے۔

ایرانی حکام نے دعویٰ کیا تھا کہ امریکی فوجی اڈوں پر میزائل حملوں میں 80 فوجی ہلاک ہوئے ہیں تاہم امریکا نے اس دعوے کے تردید کرتے ہوئے کہا تھا کہ حملوں میں کوئی فوجی ہلاک یا زخمی نہیں ہوا۔