شام کے شہر ادلب میں روسی  جیٹ طیاروں کی کارروائی  میں3 افراد ہلاک   جبکہ 9 زخمی ہوگئے۔

ترک خبر رساں ادارے کے مطابق روسی جیٹ طیاروں نے  گذشتہ شام  ادلب کے  ترمانین اور حلب کے   دارلعزہ  نامی علاقوں  پر  بمباری کی۔

فضائی کارروائی میں  3 افراد ہلاک جبکہ 9 زخمی  بھی ہوگئے۔  ہلاک اور زخمی ہونے والوں کی تعداد میں اضافے کا خدشہ  ظاہر کیا گیا ہے۔

حملوں کے بعد  لگنے والی آگ پر قابو پا لیا گیا  ہے جبکہ  علاقے سے ملبہ ہٹانے کا کام جاری ہے۔

واضح رہے کہ گذشتہ روز اقوام متحدہ  کی جانب سے جاری ہونے والے بیان میں بتایا گیا تھا  کہ دو روز قبل شام میں سرکاری فضائی حملوں میں اسپتالوں اور مہاجرین کے کیمپوں کو نشانہ بنایا  گیا ہے جس میں 300 کے قریب شہری ہلاک ہوگئے ہیں۔

 دوسری جانب  گذشتہ روز ہی شامی فوج نے اعلان کیا تھا کہ انہوں نے ملک کے شمال مغرب میں  واقع حلب شہر  پر مکمل قبضہ حاصل کرلیاہے۔

شامی صدر بشارالاسد نے  سرکاری ٹیلی ویژن پراپنے خطاب میں کہا  تھا کہ شامی فوج کی تیزی سے ہونے والی حالیہ فتوحات اس بات کی عکاس ہیں کہ نوسال سے جاری بدامنی کوبالآخرشکست ہوگی۔

اقوام متحدہ کے انسانی حقوق کے امور کے اسسٹنٹ سیکرٹری جنرل مارک لوکوک نے ایک بیان میں کہا کہ یکم دسمبر سے اب تک شمال مشرقی شام میں جاری لڑائی کے نتیجے میں 9 لاکھ افراد بے گھر ہوچکے ہیں۔ان میں سے اکثریت خواتین اور بچوں کی ہے۔

اقوام متحدہ کے عہدیدار نے یہ بتایا کہ بے گھر ہونے والے افراد سخت سردی میں کھلے آسمان تلے زندگی گزارنے پرمجبور ہیں کیونکہ مہاجرین کے کیمپ انہیں رہائش فراہم نہیں کرسکے۔

انہوں نے بتایا کہ مائیں اپنے بچوں کو گرمانے کے لیے پلاسٹک جلاتی ہیں جبکہ کئی نوزائیدہ اور کم سن بچے سردی سے مر جاتے ہیں۔