بھارت کے دارالحکومت نئی دہلی ریاست کی  ستر نشستوں پر انتخابات کی ووٹنگ مکمل ہوگئی۔

نئی دہلی کی ریاستی اسمبلی کی 70 سیٹوں پر انتخابات کے لیے پولنگ کا عمل مقامی وقت کے مطابق صبح 8 بجے سے شام 6 بجے تک جاری رہا جہاں عوام کی بڑی تعداد  کا شاہین باغ میں موجود پولنگ بوتھوں پر لوگوں کا ہجوم رہا اور لوگوں  نے حق رائے دہی استعمال کیا۔

ریاستی انتخابات میں بھارتی صدر، وزیراعلیٰ نئی دہلی اروند کیجریوال، سابق وزیراعظم منموہن سنگھ، کانگریس کی سربراہ سونیا گاندھی، ان کے بیٹے راہول گاندھی اور  بیٹی پریانکا گاندھی نے بھی ووٹ کاسٹ کیے۔

بھارتی الیکشن کمیشن کے مطابق ریاست میں رجسٹرڈ ووٹرز کی تعداد ایک کروڑ 40 لاکھ سے زائد ہے جن کے لیے 13 ہزار سے زائد پولنگ مراکز بنائے گئے جبکہ 70 نشستوں پر 672 امیدوار میدان میں ہیں۔

ریاستی انتخابات میں عام آدمی پارٹی، بھارتیہ جنتا پارٹی (بی جے پی) اور کانگریس کے درمیان سخت مقابلہ ہے۔

نئی دہلی  نشست  سے وزیراعلیٰ اروند کجریوال مسلسل تیسری بار انتخابی میدان میں ہیں، ان کے مقابلے پر بی جے پی کے سنیل یادیو  اور کانگریس کے رمیش سبھروال ہیں۔

بھارتی الیکشن کمیشن کے مطابق ریاستی انتخابات میں ووٹرز ٹرن آؤٹ 57 فیصد رہا جو گزشتہ 2015 کے انتخابات سے 10 فیصد کم ہے۔

دوسری جانب مقامی میڈیا کے ایگزٹ پول کے مطابق حکمران جماعت بھارتیہ جنتا پارٹی کو ریاستی انتخابات میں شکست کا امکان ہے۔

میڈیا پول کے مطابق عام آدمی پارٹی ایک بار پھر اسمبلی میں پوری اکثریت کے ساتھ واپس حکومت بناسکتی ہے اور اسے 59 سے 68 سیٹوں پر کامیابی مل سکتی ہے جبکہ بی جے پی کو 2 سے 11 نشستوں پر کامیابی کا امکان ہے۔

خیال رہے کہ ریاستی انتخابات میں جیت کے بعد عام آدمی پارٹی مسلسل تیسری مرتبہ حکومت بنائے گی۔

دہلی الیکشن میں پڑنے والے ووٹوں کی گنتی گیارہ فروری کو ہوگی جس کے لئے ستائیس مقامات پر گنتی کے مراکز بنائے گئے  ہیں۔

مقامی وقت کے مطابق شام 6 بجے ووٹنگ کا عمل مکمل ہوا لیکن ووٹوں کی گنتی کے بعد نتائج کا اعلان 11 فروری کو کیا جائے گا۔

واضح رہے  کہ گذشتہ انتخابات کے نتیجے میں اس ریاست میں اروند کیجریوال کی عام آدمی پارٹی (آپ پارٹی) اقتدار میں آئی تھی، عام آدمی پارٹی نے بی جے پی اور کانگریس کو شکست دی تھی۔