گذوا لوکل گورنمنٹ ایریا کے ضلع فاطا کے باکالی گاؤں پر حملہ کرنے والے مسلح ڈاکووں نے گذشتہ روز کدوونا میں ایک ہی خاندان کے 21 افراد کو گھر میں بند کر کے جلایا تھا۔

نائیجیریا میں جرائم پیشہ افراد کے گروہ نے انتقامی کارروائی کرتے ہوئے گاؤں کے 21 افراد کو گھر میں قید کر کے آگ لگادی جس کے نتیجے میں ایک ہی خاندان کے 16 افراد سمیت 21 افراد زندہ جل کر ہلاک ہوگئے۔

غیر ملکی خبررساں ادارے  کے مطابق علاقہ مکینوں نے بتایا کہ کچھ عرصہ پہلے گاؤں کے لوگوں نے سیکیورٹی اہلکاروں کے ساتھ مل کر جرائم پیشہ افراد کے کیمپ پر حملہ کیا تھا ۔

جس کا بدلہ لینے کے لیے ان جرائم پیشہ افراد نے پہلے تو گاؤں میں فائرنگ کی اور پھر کئی گاڑیوں اور مکانوں کو نذرِ آتش کردیا۔ جس کے نتیجے میں 21 افراد جاں بحق ہوگئے۔

باکالی کے علاقہ مکینوں کے رہنما ’سنی نوہو‘ نے بتایا کہ انہوں نے حملے میں 21 لوگوں کو ہلاک کیا۔

رہائشیوں کا کہنا تھا کہ حملہ آوروں نے ایک ہی خاندان کے 16 افراد کو گھر میں بند کر کے جلا دیا جس میں 6 بچے اور علاقے کے دفاعی گروپ کے 5 افراد بھی شامل تھے۔

پولیس کے ترجمان کا کہنا تھا کہ ہمیں مسلح افراد کے حملے کی اطلاع علاقہ مکینوں سے ملی تاہم ہم مزید تفصیلات اکھٹی کررہے ہیں۔

گاؤں میں رہنے والوں کا کہنا ہے کہ واقعے سے کچھ عرصہ پہلے علاقائی دفاعی گروپ کے افراد نے نائیجریا کی سیکیورٹی فورسز کے ساتھ مل کر ان جرائم پیشہ افرا کے کیمپ پر حملہ کیا تھا۔

پولیس کا کہنا تھا کہ گزشتہ ہفتے سیکیورٹی فورسز کی جانب سے علاقے میں کیے گئے آپریشن میں 250 سے زائد دہشت گردوں اور ڈاکوؤں کو ہلاک کیا گیا تھا تاہم اس دعوے کی آزاد ذرائع سے تصدیق نہیں ہوسکی ہے۔